Jak minimum 10 čałaviek zahinuła i 45 cerkvaŭ byli spalenyja padčas masavych biesparadkaŭ u Nihiery, jakija byli vyklikanyja karykaturami ŭ francuzskim ultralevym časopisie Charlie Hebdo, piša bbc.com sa spasyłkaj na miascovuju palicyju.
Jašče bolš za 170 čałaviek atrymali ranieńni. Urad abviaściŭ trochdzionnuju žałobu pa zahinułych.
Spalenaja katalickaja carkva ŭ Nihiery.
Isłamisty zabili 12 čałaviek padčas napadu na redakcyju francuzskaha časopisa ŭ pačatku studzienia za raźmieščanyja imi karykatury ci to na praroka Muchamieda, ci to na kiraŭnika tak zvanaj «Isłamskaj dziaržavy Iraka i Levanta».
Ministerstva unutranych spraŭ Nihiera zajaviła, što niekatoryja z udzielnikaŭ chvalavańniaŭ trymali ściahi ŭ padtrymku isłamisckaj hrupoŭki «Boka Charam» z susiedniaj Nihieryi.
«Boka Charam» (litaralna — «Zachodniaja adukacyja zabaronienaja») — arhanizacyja, jakuju ličyć terarystyčnaj Rada Biaśpieki AAN. Asnoŭnaja jaje baza — Nihieryja. Ź lipienia 2009 pa červień 2014 hoda bajeviki «Boka Charam» zabili i zakatavali bolš za 5000 čałaviek. Bolš za miljon čałaviek stali biežancami, kab nie žyć pad pahrozaj raspravy z boku isłamistaŭ.
U krasaviku 2014 hodu jany ŭziali ŭ pałon 276 dziaŭčynak-školnic, jakija atrymlivali «zabaronienuju adukacyju». 50 ź ich zmahli ŭciačy, astatnija, zhodna z zajavami isłamistaŭ, byli «addadzienyja zamuž». Ich prymušali pryniać isłam, a tych, chto admoviŭsia, zrabili niavolnicami, skazaŭ sam lidar «Boka Charam» Abubakar Šekau. U kastryčniku z pałonu źbiehli jašče 4 dziaŭčyny, jakija raspaviali, što ich trymali ŭ viaźnicy i kožny dzień hvałtavali.
Viadomyja i mnohija inšyja vypadki, kali bajeviki hetaj arhanizacyi brali ŭ pałon miascovych chryścijan i chryścijanak, kab katavać ich, prymušajučy pryniać isłam, pieraŭtvarać u niavolnikaŭ ci zabivać dla zapałochvańnia nasielnictva.
Urad vyśviatlaje, ci sapraŭdy «Boka Charam», jakaja dziejničaje taksama ŭ susiednich Kamierunie i Čadzie, prykłała ruku da chvali biesparadkaŭ.
***
Čytajcie taksama: Kryvavaja raźnia ŭ Nihieryi: vyniščeńnie viosak, vykradańnie ludziej i rasstreły sałdat
