Alaksandr Łukašenka 22 studzienia pryniaŭ z dakładam staršyniu Kamiteta dziaržaŭnaha kantrolu Leanida Anfimava, paviedamlaje pres-słužba kiraŭnika dziaržavy.
Łukašenka, u pryvatnaści, źviarnuŭ asablivuju ŭvahu na kantrol za nieabhruntavanym rostam cen u krainie: «Tut nam treba pracavać tak, kab asobnyja handlovyja sietki nie žyravali na prablemach ludziej, ale i tak, kab nie zahubić biźnies. Nakolki Kamitet dziaržkantrolu ŭklučany ŭ takija mierapryjemstvy i jakija ŭ vas adčuvańni ŭ suviazi z hetym? Samaje hałoŭnaje — nie zahubić biźnies i nie dapuścić nieabhruntavanaha rostu cen. Bo dla hetaha nijakich padstaŭ niama. Kali ŭvieś śviet u kryzisie, asabliva postsavieckaja prastora, nieabchodna razumieć, što treba i našamu biźniesu krychu źmienšyć apietyty. Ja nie kažu, kab zusim zaciahnuć pajasy, ale hety čas treba pieražyć razam z narodam».
Leanid Anfimaŭ raskazaŭ ab dziejnaści mižviedamasnaj rabočaj hrupy, jakaja była stvorana ŭ śniežni i praktyčna štodzień adsočvała situacyju na spažyvieckim i valutnym rynkach da taho času, pakul stan spraŭ adnosna nie stabilizavaŭsia. Jon adznačyŭ, što ciapier niama nijakaj nieabchodnaści dla ŭmiašańnia ŭ hetyja pytańni KDK, pakolki skłałasia adnosnaja raŭnavaha na spažyvieckim i valutnym rynkach. Leanid Anfimaŭ skazaŭ: «My prosta adsočvajem stan spraŭ dla taho, kab adreahavać, kali buduć uźnikać niejkija nadzvyčajnyja situacyi».
