Strełki Hadzińnika Sudnaha dnia — umoŭnaha pakaźnika blizkaści jadziernaha kataklizmu, pieraviedzienyja na 2 chviliny napierad.
Unočy 22 studzienia supracoŭniki časopisa Bulletin of Atomic Scientists pieraviali Hadzińnik Sudnaha dnia na 23:57, na 2 chviliny napierad. Umoŭny hadzińnik pakaža 12 nočy ŭ čas hłabalnaj jadziernaj katastrofy.
Pryčyny simvaličnaha kroku — niaspynnyja klimatyčnyja źmieny i dalejšy raspaŭsiud jadziernaj zbroi.
Rašeńnie pra pieravod strełak z 1947 hoda prymaje Rada dyrektaraŭ časopisa Bulletin of the Atomic Scientists z dapamohaj zaprošanych ekśpiertaŭ, u tym liku nobieleŭskich łaŭreataŭ. Časopis zasnavany navukoŭcami Manchetanskaha prajekta (prahramy ZŠA pa stvareńni jadziernaj zbroi) i raspaviadaje pra zbroju masavaha źniščeńnia, klimatyčnyja źmieny, niebiaśpiečnyja chvaroby.
Ad pačatku hadzińnik pakazvaŭ 23:53, 7 chvilin da apoŭnačy.
Praz dva hady hadzińnik pieraviali na siońniašni čas, 3 chviliny da apoŭnačy, praz vyprabavańni Savieckim sajuzam jadziernaj zbroi. Nastupny pieravod strełak adbyŭsia ŭ 1953 hodzie, kali SSSR i ZŠA praviali z roźnicaj u 9 miesiacaŭ vyprabavańni termajadziernych bomb. Tady hadzińnik pakazaŭ biez 2 chvilin 12, samy blizki da poŭnačy čas za historyju.
U 60-ch čas adkaciŭsia nazad praz asensavańnie pahrozy hłabalnaj katastrofy i padpisańnie damovy ab zabaronie vyprabavańniaŭ jadziernaj zbroi. Samy rańni čas, biez 17 chvilin 12, hadzińnik pakazaŭ u 1991 hodzie, pa zaviaršeńni Chałodnaj vajny. Ale z taho času strełki išli amal tolki napierad.
Hadzińnik Sudnaha dnia zhadvajecca ŭ hrafičnym ramanie i filmie «Vartaŭniki» (Watchmen), u pieśni Iron Maiden «2 Minutes to Midnight» i albomie Linkin Park «Minutes to Midnight», u pieśni «A u mira čas do połnoči», što vykonvali rasijskija hurty «Instrukcija po vyživaniju» i «Hraždanskaja Oborona».
