Katok rasijskaj prapahandy dakaciŭsia da biełaruskich futbolnych fanataŭ. Na Lenta.ru siońnia źjaviŭsia artykuł, aŭtar jakoha paraŭnoŭvaje biełaruskich «ultras» z ukrainskim «Pravym siektaram».
Jak piša Uładzisłaŭ Malcaŭ u svaim «śpiecyjalnym rasśledavańni», biełaruskija zaŭziatary padčapili «virus Majdanu» ad svaich paŭdniovych kaleh: maŭlaŭ, biełaruskich fanataŭ natchniaje uzor maładych ukrainskich chłopcaŭ «ź nizoŭ», jakija ciapier, zhodna z aŭtaram, «biez małoha vyrašajuć los cełaj krainy».
Pry hetym ašałamlalnyja sacyjalnyja lifty i jość toje, što vabić biełaruskich fanataŭ i robić ich radykałami. Takaja dumka vynikaje sa słovaŭ niejkaj «ananimnaj krynicy»:
«Ich (fanataŭ) kumiry — uzbrojenyja chłopcy, jakija vyrašajuć, kamu žyć, a kamu pamierci.
I im nie istotna, da čaho heta pryviadzie i jakaja budučynia ich čakaje. Simvały supracivu siońnia — heta «mova», jakuju jany nie viedajuć, «biełaruskaja łacinka», na jakoj jany nikoli nie buduć pisać, hierb – vyšyvanka, ale hałoŭnaje – heta ślapaja nianaviść da ŭsiaho ruskaha i da Rasijskaj dziaržavy», — śćviardžaje aŭtar.
Uładzisłaŭ Malcaŭ taksama aburajecca simvolikaj fanataŭ, asabliva frazaj «Biełaruś maje być volnaj», jakaja źmieščana na adnoj z patryjatyčnych sukołak fanataŭ «Dynama-Minsk». Taki nadpis padajecca aŭtaru «ščyra apazicyjnym» — u dačynieńni da kaho, pry hetym, nie ŭdakładniajecca.
Niepalitkarektnym žurnalistu padajecca i banier u honar Pieramohi pad Oršaj, što biełaruskija fanaty vyviesili na trybunach padčas matču pamiž našaj zbornaj i kamandaj Luksiemburha.
Adnak, niahledziačy na abvinavačańni našych zaŭziataraŭ u nieprykrytym rusafobstvie, aŭtar znachodzić patencyjnych vinoŭnikaŭ u vypadku niesankcyjanavanych akcyj rasijskaj «ultry» — «biełaruskija fanackija hrupoŭki idejałahična apracoŭvajuć rasijski futbolny fanacki ruch».
Naprykancy tekstu aŭtar pałochaje biełaruskija ŭłady tym, što «biełaruskaja apazicyja» atrymała svoj «mahutny «Pravy siektar», zvykły da bojek i zdatny na šturm uradavych ustanovaŭ na bližejšych prezidenckich vybarach».