10 studzienia ŭ škołach Biełarusi prajšoŭ pieršy etap respublikanskaha konkursu pa ajčynnaj historyi. Zhodna z aficyjnaj farmuloŭkaj hety konkurs pryśviečany «70-hodździu Pieramohi SSSR nad fašysckaj Hiermanijaj».
Pravodzicca jon biełaruskim hramadskim abjadnańniem «Tavarystva pamiaci voinaŭ i achviar Vialikaj Ajčynnaj vajny» pry padtrymcy Ministerstva adukacyi Respubliki Biełaruś.
Zdavałasia b, nu konkurs i konkurs, što ŭ im takoha. Adnak, peŭnyja momanty vyklikajuć ździŭleńnie. Tak, naprykład, pry padrychtoŭcy školnikam «rekamiendujuć» pačytać dakład Pucina na Vałdajskim forumie ŭ Sočy.
A adno z pytańniaŭ hučyć tak: «Čamu kirujučyja koły dziaržaŭ byłych sajuźnikaŭ SSSR pa razhromie fašyzmu, a taksama Hiermanii, ciapier tajemna i vidavočna zaachvočvajuć adradžeńnie i dziejnaść u inšych krainach nieanacysckich, prafašysckich i nacyjanalistyčnych ruchaŭ i arhanizacyj?»
Pry hetym arhanizatary konkursu nie chavajuć, što majuć na ŭvazie «Amieryku, jakaja ładzić aranžavyja revalucyi».
«U dakładzie Pucina raskryta sutnaść siońniašniaj zachodniaj hieapalityki. I Pucin vyrazna pajaśniŭ, čamu nacyzm siońnia reanimujecca. U takich krainach, jak Ukraina, Zachad siońnia robić staŭku na prafašysckija i ultranacyjanalistyčnyja siły», — niby z ekrana telekanała «Rośsija» raspavioŭ Mikałaj Papoŭ, člen «Tavarystva pamiaci» i kiraŭnik konkursu.
A na pytańnie, čamu ŭ konkursie najaŭnaść byłych sajuźnikaŭ, jakija «padtrymlivajuć fašyzm», padajecca jak aksijoma, Papoŭ adkazaŭ tak:
«Heta fakt siońniašniaj hieapalityki! Tamu my i śćviardžajem heta! — ad naiŭnaści pytańnia jon navat zaśmiajaŭsia. — Złučanyja Štaty biezumoŭna padtrymlivajuć adradžeńnie nieanacysckich arhanizacyj. Ź jakoj metaj? Rabić aranžavyja revalucyi! Navošta? Heta treba Abamu spytać, navošta jon ich robić!».
Rychtavali pytańni da konkursu ŭ «Tavarystvie pamiaci», skazaŭ Papoŭ. Ale ź Minadukacyi ŭsio ŭzhadniali. Pytańniaŭ nie ŭźnikła. Cikava, što siarod metaŭ konkursu ŭkazvajucca «ŭmacavańnie nacyjanalnaj tradycyi uzajemadapamohi i družby ź inšymi narodami».