Sojm Partyi BNF pryniaŭ adpaviednuju zajavu ŭ suviazi z ustupleńniem u siłu abnoŭlenaha Zakonu Respubliki Biełaruś «Ab vajennym stanoviščy».
Partyja BNF zaniepakojenaja novaj redakcyjaj zakonu, jaki, u pryvatnaści, razhladaje za napad na Respubliku Biełaruś nie tolki dziejańni, naŭprost skiravanyja suprać krainy, ale taksama i akt ŭzbrojenaj ahresii z boku jakoj-kolviek dziaržavy abo hrupy dziaržaŭ, ździejśnieny suprać dziaržavy-udzielnika Arhanizacyi Damovy ab kalektyŭnaj biaśpiecy (ADKB).
Na dumku siabroŭ Sojmu BNF, novaja redakcyja zakona nieapraŭdana pašyraje paniaćcie napadu na Respubliku Biełaruś, uviazvajučy jaho z padziejami ŭ Armienii, Rasii, Tadžykistanie (jaki maje miažu ź niestabilnym Afhanistanam) dy inšych krainach ADKB, u jakich majucca šmatlikija krynicy niestabilnaści i terytaryjalnyja kanflikty. «Hetkaja traktoŭka pahroz nacyjanalnaj biaśpiecy nie adpaviadaje nacyjanalnym intaresam Biełarusi i stavić unutranuju palityku ŭ našaj krainie ŭ zaležnaść ad kanfliktaŭ u paraŭnalna dalokich ad našaj krainy «haračych kropkach», — havorycca ŭ zajavie.
Siabry Sojmu Partyi BNF ŭ pryniatym dakumiencie adznačyli, što ŭniesienyja ŭ zakanadaŭstva źmieny mohuć być adnoj z prajaŭ stvareńnia pravavoj bazy dla ŭciahvańnia Biełarusi ŭ šerah kanfliktaŭ, u tym liku inśpiravanyja ahresiŭnymi pravakacyjami z boku rasiejskich revanšystaŭ.
U Partyi BNF pierakananyja, novy zakon stvaraje pravavyja padstavy dla nieabhruntavanaha abmiežavańnia pravoŭ i svabod hramadzian, asabliva ŭ častcy svabody słova i volnaha raspaŭsiudu infarmacyi, istotna pašyraje miežy vajennaj cenzury i mahčymaha vykarystańnia śpiecyjalnych srodkaŭ i zbroi.
U svaim zvarocie Partyja BNF patrabuje vychadu Respubliki Biełaruś z ADKB i vystupaje za pabudovu novaj architektury nacyjanalnaj biaśpieki z aporaj na supracu z krainami Jeŭraatłantyčnaj supolnaści.
Nahadajem, 10 studzienia 2015 hodu ŭ Zakon Respubliki Biełaruś «Ab vajennym stanoviščy» byli ŭniesienyja źmieny i dapaŭnieńni, jakija, siarod inšaha, istotna pašyrajuć pieralik abstavin, što kvalifikujucca ŭ jakaści napadu na Respubliku Biełaruś i mohuć słužyć padstavaj dla ŭviadzieńnia vajennaha stanovišča. Hetyja źmieny nabyli moc 1 lutaha 2015 hoda.
