 Barys Harecki |
Śpis nievyjaznych biełaruskich palitykaŭ i hramadzkich dziejačaŭ papoŭniŭsia. Siońnia biełaruskija pamiežniki nie puścili va Ŭkrainu Barysa Hareckaha, jaki jechaŭ u Kijeŭ na seminar pa radyjožurnalistycy.
Barysa vysadzili ź ciahnika na stancyi “Cierachoŭka”. Pamiežniki paviedamili, što proźvišča junaka znachodzicca ŭ śpisie asobaŭ, jakim časova zabaronieny vyjezd za miežy Biełarusi. Kolki Barys nie sprabavaŭ vyśvietlić čamu źjaviłasia takaja zabarona, adkazu jon nie atrymaŭ.
Letaś Barys Harecki byŭ asudžany pa kryminalnaj spravie za dziejnaść ad imia niezarehistravanaj arhanizacyi. Jamu prysudzili 30 bazavych vieličyń štrafu, ale Barys kaža, što daŭno spłaciŭ hetyja hrošy.
Barys Harecki navučajecca na pieršym kursie fakultetu biełarusistyki Vilenskaha pedahahičnaha ŭniversytetu. Zabarona na vyjezd za miažu, moža adbicca na atrymańni adukacyi.
Nahadajem, što 1 studzienia apaviaščeńnie ab zabaronie na vyjezd za miažu atrymaŭ lider AHP Anatol Labiedźka. Barys Harecki staŭ druhim u hetym śpisie.
