Siońnia ŭ Navapołacku na liniju vyjšaŭ supiersučasny ekśpierymientalny tramvaj, raspracavany i vyrableny staličnym «Biełkamunmašam».
Jak paviedamiła načalnica ŭčastka ekspłuatacyi ruchomaha sastavu NTKUP «Tramvajny park» Alena Cychiełašvili, takich vahonaŭ u biełaruskich haradach z tramvajnych rucham jašče nie ekspłuatavali. Paśla doŭhaha pieryjadu puskanaładačnych rabot najnoŭšaja madel adnasiekcyjnaha paŭnizkapadłohavaha tramvajnaha vahona narešcie adpraviłasia z pasažyrami pa adzinym u horadzie maršrucie. Hetaja raspracoŭka moža nie tolki stać asnovaj rejkavaha elektratranspartu Biełarusi, ale i zabiaśpiečyć «Biełkamunmaš» dobrymi ekspartnymi zamovami.
Madel BKM-802 źjaŭlajecca niedarahoj alternatyvaj trochsiekcyjnamu chutkasnamu tramvaju vialikaj umiaščalnaści BKM-843 i pryznačanaja dla ekspłuatacyi na maršrutach ź nievysokim pasažyrapatokam u nievialikich haradach. Daŭžynia vahona składaje 15,5 m, ahulnaja ŭmiaščalnaść raźličana na 165 čałaviek: siadziačych miescaŭ — 28 (u tym liku 4 — dla pasažyraŭ z abmiežavanaj mabilnaściu), stajačych — 137, a taksama adno miesca ŭ siaredzinie sałona — dla dziciačaj abo invalidnaj kalaski ź sistemami fiksacyi i abviaščeńnia kiroŭcy.
«Unutry ŭsiudy elektronika: ustanoŭlenyja sinchranizavanyja vizualnaja i akustyčnaja infarmacyjnyja sistemy dla pasažyraŭ, termarehulatar u sałonie i kandycyjanier — u kabinie kiroŭcy. Aśviatleńnie śviatłodyjodnaje. Dla pasažyraŭ zručnaja kanstrukcyja ź nizkaj padłohaj ŭ siaredzinie vahona, jakaja palahčaje pasadku/vysadku. Vahon dobra razhaniajecca i płaŭna tarmozić. Pahladzim, jak jon prajavić siabie ŭ pracesie aktyŭnaj ekspłuatacyi, asabliva ŭ pieršyja try harantyjnaja hady. Hety tramvaj razam ź jašče dvuma vahonami budzie absłuhoŭvać liniju dniom», — patłumačyła Alena Cychiełašvili.
