- Što vymušaje ludziej nabyvać kvatery ŭ hetych žudasnych hmachach?
- Čamu «Dzień surka» źniaty ŭ ZŠA, chacia dakładna apisvaje voś hetuju minskuju zimu, dzie kožny dzień padobny da papiaredniaha?
- Čamu my dumajem, što našyja dzieci praciahnuć spravy, jakija my nie zdoleli skončyć?
- Čamu my pišam nie pra toje, što nas realna turbuje, a toje, što turbuje, što balić, zaŭsiody zastajecca pa-za ŭvahaj?
- Čamu na płoščy Niezaležnaści dva padziemnyja pierachody, jakija nie spałučajucca adzin z adnym? Čamu nielha ŭvajści la hatela «Minsk» i vyjści la mietro? Chto heta prydumaŭ? I našto?
- Čamu ŭ Minsku jość vulica Amieljaniuka, a vulicy Uładzimira Karatkieviča niama?
- Čamu pa hryby možna chadzić tolki ŭ lipieni-kastryčniku?
- Navošta nam u stalicy Ruski dramatyčny teatr? My što, ruskija? I čamu ŭ nas niama Japonskaha dramatyčnaha teatra ci Ukrainskaha dramatyčnaha teatra?
- Čamu jany nie skažuć prosta: kancert Vajciuškieviča admianili tamu, što ŭ hetym hodzie vybary?
- Čamu maje drennyja teksty čytajucca lepiej za dobryja?
- Čamu asnoŭnyja kolery našaj vopratki — šery i čorny? Chiba čyrvonaja ci zialonaja «alaska» vyhladała b drenna?
- Čamu telefony pamierłych ludziej nie źnikajuć sami saboj z telefonnaj knihi? Čamu ty ŭvieś čas natykaješsia na niabožčykaŭ, i ruki niejak nie padymajucca ich vydalić?
- Čamu pa televizary pakazvajuć nie tych ludziej, jakich chočacca bačyć? A tyja, kaho my realna pavažajem i prahniem, tam nie źjaviacca nikoli?
- Čamu ludziej z katami ličać bolšymi ehaistami za ludziej z sabakami? Katy lubiać tolki siabie, sabaki lubiać svaich haspadaroŭ, dyk chto tut samalubny ehaist?
- Adkul u siaredzinie žyćcia ŭ mužčyny źjaŭlajecca patreba pažyć adnamu?
- Čamu Łana i Endru Vačoŭski, aŭtary «Matrycy», źniali taki tupy treš, jaki ciapier idzie ŭ kino?
- Čamu va ŭsim śviecie kantrakty harantujuć bieskłapotnuju, pracaŭładkavanuju budučyniu, a ŭ nas — strach za jaje?
- Čamu dahetul u biełaruskich hastranomach handlujuć «Kašaj suvoraŭskaj»?
- Čamu z našych haradoŭ źnikajuć drevy? Čamu ŭzdoŭž praśpiekta Niezaležnaści nie zastałosia lip i kaštanaŭ?
- Čamu knihi, jakija tut vydajucca, napisany stylem, a nie sercam? Čamu sastarełyja «esteckija» vypinańni pieravažajuć u ich nad kranalnym? Aŭtary i čytačy stracili patrebu niešta adčuvać?
- Čamu tut tak chałodna?
- Čamu žadańnie lapić śniežnuju babu ŭłaścivaje tolki dzieciam i ličycca haniebnym dla darosłych? Heta ž tak zachaplalna…
- Čamu, ź inšaha boku, žadańnie kulnuć čarku haniebnym dla darosłych nie ličycca?
- Čamu jany rujnujuć stalinki i nie čapajuć chruščoŭki?
- Čamu ŭ bolšaści mužčyn tut adna pryčoska?
- Čamu jany zabaraniajuć nasić navušniki ŭ mietro ale pakidajuć na płatformach televizary «BiełRosRekłamy»?
- Čamu vymierła maja vioska Barbarova ŭ Hłuskim rajonie?
- Jak tak stałasia, što samaj raspaŭsiudžanaj stravaj u našych kaviarniach zrabiłasia pica?
- Adkul hetaje adčuvańnie, što tut niemahčyma pakinuć śled, a ŭsio, što ty zrobiš, zabudziecca, jak zabyli Hrycanava, Cudzika, Zielanoha?
- Čamu ŭ try hadziny nočy ŭ Minsku tak šmat mašyn? Chto hetyja ludzi? Što jany robiać u ciemry? Jakija spravy ich? Čym zajmajucca, pakul inšyja śpiać?
- Čamu dla taho, kab u biełaruskich restaranach pačali hatavać kašu z harbuza, nacyjanalnuju biełaruskuju stravu, treba, kab jana pryjšła da nas z Maskvy ŭ vyhladzie «supu-piure z harbuza, nacyjanalnaj haicianskaj stravy»?
- Čamu ŭ Minsku jość «Makdonalds» i niama «Burhierkinha» dy «Starbaksa»?
- Čamu ŭsie čuli pra Smalaka i nichto nie čuŭ pra Słavuka?
- Čamu bolšaść minčukoŭ bolej nie adčuvaje Minsk svaim rodnym horadam? Chto tut panuje, chto hetyja ludzi?
- Čamu va ŭsich ludziej navokał adzin sotavy telefon u niekalkich varyjacyjach? Čamu pry hetym pakupka hetaha telefona ličycca padkreślivańniem indyvidualnaści?
- Čamu, kali hladziš na dziaŭčat, što šukajuć kachanaha ŭ kłubie, adčuvaješ žal da ich, a nie žadańnie padyści paznajomicca? Čamu hety žal nie uźnikaje ŭ amierykanskim ci niamieckim načnym kłubie, dzie taja ž scena nie prasiaknutaja vidavočnaj žyćciovaj dramaj, što dobra čytajecca ŭ vačach?
- Čamu biełaruskaja «tusoŭka» tak biezhustoŭna apranutaja?
- Jak im rastłumačyć, što vasabi nie varta mazać na hunkany?
- Čamu štohod my čakajem viasny, dumajučy pra toje, jak budziem siadzieć nočy napralot u jabłynievym sadzie, jak budziem hladzieć na vodblisk miesiaca ŭ vadzie lasnoha voziera, a kali prychodzić travień, my dni napralot pahłyblenyja ŭ niejkija «spravy», što trymajuć nas u zadušnych čatyroch ścienkach?
- Čamu my ničoha nie robim ciapier, kali jany «adbudoŭvajuć» viežu ŭ Navahrudku? Tuju samuju viežu, jakuju malavaŭ jašče Napaleon Orda?
- Čamu ŭ biełaruskich teatrach akciory kryčać tam, dzie treba šaptać, i śmiajucca tam, dzie varta płakać? Čamu publika pry hetym nie sychodzić, a navat, byvaje, apładziruje?
- Čamu my adčuvajem siabie adzinokimi, kali hladzim na zornaje nieba?
- Čamu pry ŭsim bahaćci pachaŭ, pry ŭsioj pryhažości dy raznastajnaści Azii, samy pryhožy vodar u śviecie — u prostaha biełaruskaha bezu?
- Čamu my pamiatajem pieršy pacałunak, chacia jon nie zaŭsiody samy cudoŭny i vielmi časta prosta vypadkovy, z tymi, chto chucieńka prabieh pa tambury našaha žyćcia?
- Čamu tak chočacca zajści ŭ adrynu ŭ pamierłaj vioscy Barbarova Hłuskaha rajona, kinucca tvaram u siena i dychać, dychać, dychać? I čamu tak syšłosia, što heta jakraz taja sprava, jakuju niemahčyma ździejśnić bolej ni za jakija hrošy?
