 |
Jak tolki Jeŭraradyjo daviedałasia pra heta, my abtelefanavali vakzały, i tam paćvierdzili, što lhoty ŭžo viarnuli. Pa słovach dyrektara ahienctva «Minsktrans» Vasila Łaŭrynoviča, kiraŭnikam usich filijałaŭ pradpryjemstva pryjšło tłumačeńnie, što navat vieterany i afhancy z krain SND majuć prava biaspłatna jeździć u Biełarusi.
Vasil Łaŭrynovič: «Źviartajem vašu ŭvahu na vykanańnie dziejučaha pahadnieńnia ab uzajemnym pryznańni pravoŭ na lhotny prajezd invalidaŭ i ŭdzielnikaŭ Vialikaj Ajčynnaj vajny, a taksama asobaŭ, pryroŭnienych da ich».
Heta mižnarodnaje pahadnieńnie było padpisana 12 sakavika 1993 hoda ŭ Maskvie kiraŭnikami ŭradaŭ krain SND. U hety čas biełaruskim uradam kiravaŭ Viačasłaŭ Kiebič. Viačasłaŭ Francavič pryhadaŭ u intervju Jeŭraradyjo, što mienavita jon staviŭ podpis pad hetym pahadnieńniem.
Pa słovach dyrektara ahienctva «Minsktrans» Vasila Łaŭrynoviča, ciapier mižuradavaje pahadnieńnie, padpisanaje Kiebičam amal 15 hadoŭ tamu, maje bolšuju vahu, čym zakon Biełarusi ab ilhotach.
Vasil Łaŭrynovič: «Normy pahadnieńnia praduhledžvajuć bolš šyrokija lhoty na prajezd dla pakazanych u pahadnieńni asobaŭ, čym normy Zakonu Respubliki Biełaruś «Ab dziaržaŭnych sacyjalnych ilhotach, pravach i harantyjach dla asobnych katehoryj hramadzianaŭ».
Takim čynam, zhodna ź mižuradavym pahadnieńniem, udzielniki Vialikaj Ajčynnaj vajny, a taksama voiny‑internacyjalisty ŭ adpaviednaści z Dadatkam 3 majuć prava na biaspłatny prajezd u haradskim i pryharadnym transparcie. I heta niahledziačy na toje, što zakon «Ab dziaržaŭnych sacyjalnych ilhotach» zabraŭ u vieteranaŭ takoje prava.
Darečy, zhodna z pahadnieńniem, ilhotnym prajezdam mohuć karystacca i tyja, chto supravadžaje invalidaŭ vajny. Samaje hałoŭnaje, što hetaja infarmacyja ŭžo daviedziena da transpartnikaŭ i čyhunačnikaŭ. A padrabiaźniej aznajomicca sa śpisam ilhotaŭ, jakimi zabiaśpiečvaje mižuradavaje pahadnieńnie, možna tut.
* * *
U 2007 hodzie u Biełarusi pražyvała kala 65 tysiač vieteranaŭ VAV, ź ich 15 tysiač čałaviek — invalidy VAV I i II hrup. Pavodle zakonu ab ilhotach, ilhoty pakidalisia tolki invalidam. Ciapier usie 65 tysiač vieteranaŭ zmohuć jeździć biaspłatna. Na siońniašni dzień u Biełarusi žyvie 21 tysiača voinaŭ‑afhancaŭ, jany taksama majuć prava na biaspłatny prajezd.
