Parłamienckaja asambleja Savieta Jeŭropy zaklikała baki vykonvać siońniašnija minskija damoŭlenaści.
«Ja ciopła, ale aściarožna vitaju siońniašniaje rašeńnie ab spynieńni ahniu va ŭschodniaj Ukrainie», — zajaviła prezident PASIE An Brasier.
«Heta abnadziejlivaja prykmieta mahčymaha vyrašeńnia kryzisu ŭ krainie, choć asnoŭnyja pieraškody zastajucca», — cytuje jaje pres-słužba PASIE.
«Ja zaklikaju ŭsie baki, kab ciapier dziejničać adkazna, kab zachavać i realizavać hetaje pahadnieńnie. Pierš za ŭsio, nasille pavinna spynicca.
Jana adznačyła, što spynieńnie vajennych dziejańniaŭ dazvolić Ukrainie ruchacca napierad, pravodzić nieabchodnyja reformy, uklučajučy kanstytucyjnyja i pa decentralizacyi ŭłady.
«Saviet Jeŭropy i jaho Parłamienckaja asambleja buduć praciahvać akazvać padtrymku ŭkrainskim uładam u ich namahańniach pa realizacyi hetych važnych i terminovych reform», — padkreśliła Brasier.
Pavodle jaje słoŭ, jana taksama zadavolena zajavaj prezidenta Piatra Parašenki ab tym, što dasiahnuta damoŭlenaść ab vyzvaleńni člena ŭkrainskaj delehacyi ŭ PASIE — ukrainskaj lotčycy Nadziei Saŭčanka, jakaja ŭtrymlivajecca ŭ maskoŭskim SIZA.
Brasier paviedamiła, što sudakładčyk PASIE pa palityčnych nastupstvach kryzisu va Ukrainie Chryścina Zielijenkava naviedaje Ukrainu na nastupnym tydni, kab trapić va ŭschodnija rehijony krainy, jak tolki tam budzie ŭstanoŭleny režym spynieńnia ahniu. Paśla hetaha Zielijenkava taksama sustreniecca z Parašenkam. Akramia taho, u sakaviku Ukrainu naviedajuć sudakładčyki PASIE Majlis Reps (Estonija) i Žan-Kłod Mińjon (Francyja).
