Rasija šukaje varyjanty skaračeńnia vydatkaŭ na piensii i źmianšeńnie deficytu Piensijnaha fondu. Siarod mahčymych zachadaŭ — rost adličeńniaŭ u piensijny fond na 1% ad zarpłaty, skaračeńnie piensij piensijanieram, jakija pracujuć, a taksama pavieličeńnie piensijnaha ŭzrostu. Pra heta pišuć rasijskija ŚMI.
Pracujučych piensijanieraŭ, pa zadumcy Minfina, pazbaviać fiksavanaj častki piensijnych vypłat, kali ich štomiesiačny dachod składaje bolš čym 2,5 pražytačnaha minimumu. Takim piensijanieram pakinuć tolki strachavuju častku piensii.
Taksama Minfin raźličvaje z 2016 hoda pačać pavyšać piensijny ŭzrost mužčyn i žančyn da 63 hadoŭ. Rabić heta płanujecca paetapna, pa 0,5 hadoŭ kožny hod. U takim razie, piensijny termin u mužčyn u 63 hady budzie dasiahnuty da 2022 hoda, a ŭ žančyn — da 2032. Ciapier mužčyny ŭ Rasii vychodziać na piensiju ŭ 60 hadoŭ, a žančyny — u 55 hadoŭ, jak i ŭ Biełarusi. U bolšaści krain Jeŭrasajuza pracujuć našmat daŭžej, da 65—67 hadoŭ.
