Alaksandr Łukašenka najbližejšym časam moža naviedać Iran. Pra heta paviedamiŭ ministr zamiežnych spraŭ Irana Machamad Džavad Zaryf 17 lutaha na sustrečy ŭ Minsku z kiraŭnikom MZS Biełarusi Uładzimiram Makiejem.
«Spadziajemsia ŭ najbližejšaj budučyni prymać ź vizitam prezidenta Biełarusi ŭ Iranie. Hety vizit pasłužyć dalejšamu ŭmacavańniu adnosinaŭ», — skazaŭ iranski ministr zamiežnych spraŭ.
Zaryf padkreśliŭ, što pamiž Iranam i Biełaruśsiu «zaŭsiody było dobraje razumieńnie na mižnarodnaj arenie». «I ŭ budučyni my praciahniem padtrymku adzin adnaho, — skazaŭ jon. — U nas taksama zaŭsiody byli dobryja adnosiny ŭ palityčnaj i ekanamičnaj śfierach, jakija raźvivajucca, ale jašče vielmi dalokija ad svaich sapraŭdnych patencyjałaŭ».
Kiraŭnik MZS Irana adznačyŭ, što ŭ najbližejšy čas pavinna adbycca čarhovaje pasiadžeńnie mižuradavaj kamisii pa handlova-ekanamičnym supracoŭnictvie, na jakim baki abmiarkujuć šlachi dalejšaha raźvićcia handlova-ekanamičnych adnosinaŭ.
U svaju čarhu Uładzimir Makiej adznačyŭ, što ŭ 2014 hodzie tavaraabarot Biełarusi i Irana značna ŭzros. «Ale my nie da kanca vykarystoŭvajem naš patencyjał dvuchbakovaha supracoŭnictva, — zaŭvažyŭ jon. — Naša zadača zaklučajecca ŭ tym, kab namiecić tyja miery, jakija dazvolać nadać bolšuju dynamiku našamu handlova-ekanamičnamu supracoŭnictvu i zrabić tak, kab jano adpaviadała ŭzroŭniu palityčnaha ŭzajemadziejańnia našych krain».