Hienieralny sakratar NATA Jens Stołtenbierh zaklikaŭ Rasiju spynić padtrymku sieparatystaŭ na Danbasie. Pra heta jon zajaviŭ 18 lutaha ŭ Ryzie paśla sustrečy z prezidentam Łatvii, paviedamlajecca na aficyjnym sajcie NATA.
«Minskija pahadnieńni — heta najlepšaja mahčymaść dla praciahłaha mirnaha vyrašeńnia, — skazaŭ jon. — Što sapraŭdy maje značeńnie, dyk heta spynieńnie ahniu i vykanańnie minskich damoŭlenaściaŭ».
Stołtenbierh padkreśliŭ, što zaniepakojeny paharšeńniem situacyi ŭ Debalcavie. «Admova sieparatystaŭ vykonvać, pavažać režym spynieńnia ahniu stavić pad pahrozu pahadnieńnie. Jak i ich admova zabiaśpiečyć dostup u hety rajon naziralnikam ad ABSIE», — adznačyŭ jon.
Pavodle słoŭ Stołtenbierha, rasijskija vojski, artyleryja i padraździaleńni procipavietranaj abarony, a taksama elemienty kamandavańnia i kiravańnia «ŭsio jašče aktyŭnyja va Ukrainie».
«Rasija padtrymlivała sieparatystaŭ uzbrojenymi siłami, treniroŭkami i pastaŭkami zbroi, — skazaŭ Stołtenbierh. — Ja zaklikaju Rasiju spynić padtrymku sieparatystaŭ. I vyvieści jaje vojski i vajennuju techniku z terytoryi ŭschodniaj Ukrainy ŭ adpaviednaści ź minskim pahadnieńniem. Sieparatysty pavinny spynić ataki nieadkładna».
