Śniežańskaja pastanova ŭrada № 1207, jakaja faktyčna zamaroziła ceny na spažyvieckim rynku Biełarusi, moža być admieniena ŭ druhim kvartale hetaha hoda.
Pra heta paviedamiła 19 lutaha padčas zaklučnaha vystupleńnia na pasiadžeńni Respublikanskaha kłuba dyrektaraŭ Žanna Tarasievič, sustaršynia praŭleńnia Biźnies-sajuza pradprymalnikaŭ i najmalnikaŭ imia Kuniaŭskaha.
Jana adznačyła, što pytańnie pra admienu cenavaha kantrolu ŭźnimałasia 13 lutaha padčas kalehii Ministerstva handlu.
«Było zajaŭlena, što čakajecca praktyčna admiena pastanovy № 1207 i Ministerstva ekanomiki ŭniasie adpaviednyja prapanovy», — paviedamiła Tarasievič, udakładniŭšy, što rašeńnie pra admienu maratoryja na rost cen płanujecca padrychtavać u druhim kvartale hetaha hoda.
Nahadajem, u śniežni 2014 hoda na fonie rostu kursu dołara ŭ krainie ŭrad pryniaŭ pastanovu № 1207, jakaja ŭstanaviła faktyčnuju zabaronu na pavyšeńnie cen na spažyvieckim rynku.
U siaredzinie studzienia dziaržorhany vystupili z rastłumačeńniami i paviedamili, što pavyšać ceny na impartny tavar možna na vieličyniu źmieny kursu dołara. Adnak hetaje rašeńnie raspaŭsiudžvajecca ciapier tolki na toj impartny tavar, jaki byŭ pastaŭleny ŭ Biełaruś paśla 18 śniežnia.
Ministerstvy handlu i ekanomiki 19 lutaha vystupili z novymi rastłumačeńniami da pastanovy № 1207 i pryviali novyja rekamiendacyi, u vypadku vykanańnia jakich da pradpryjemstvaŭ nie buduć prymianiacca miery adkaznaści, praduhledžanyja śniežańskaj pastanovaj.
U pryvatnaści, zhodna z rastłumačeńniami dziaržorhanaŭ, z 20 lutaha vytvorcy mohuć pavyšać adpusknyja ceny (taryfy) na vieličyniu źmieny koštu syraviny i materyjałaŭ, kamplektujučych, tary i ŭpakoŭki, jakija pastupili paśla 18 śniežnia 2014 hoda.
Da 20 lutaha pavialičvać ceny na syravinu i materyjały, kamplektujučyja, taru i ŭpakoŭku ajčynnaha pachodžańnia, a taksama na tyja, jakija pachodziać z krain Jeŭrazijskaha ekanamičnaha sajuza, nie dapuskałasia.
Pavodle mierkavańnia ekśpiertaŭ, rašeńnie dziaržorhanaŭ, pryniataje 19 lutaha, ź`iaŭlajecca mieraj pa asłableńni cenavaha kantrolu, ustanoŭlenaha dva miesiacy tamu pastanovaj № 1207.
Varta adznačyć, što raniej biźnies-sajuzy nieadnarazova źviartalisia va ŭrad i nastojvali na admienie pastanovy № 1207. Nieabchodnaść admieny cenavaha kantrolu jany tłumačyli niehatyŭnym upłyvam hetaha rašeńnia na pradpryjemstvy.
Pavodle mierkavańnia biźnies-supolnaści, cenavy kantrol pryvodzić da stratnaj dziejnaści mnohich pradpryjemstvaŭ, što paśla moža spravakavać «łavinapadobny rost niepłaciažoŭ», skaračeńnie vytvorčaści i źnižeńnie zarabotnaj płaty.
