Hrupa kampanij Glassbel, ułaśnikami jakoj źjaŭlajucca Dźmitryj i Łarysa Sabaleŭskija, stała ŭładalnicaj kantrakta na škleńnie adnaho z samych hrandyjoznych budaŭničych prajektaŭ sučasnaści — kompleksu Opera House u Dubai.
Jak paviedamlajecca na sajcie Glassbel, kantrakt byŭ padpisany na vystavie BIG 5 u Dubai, jakaja prachodziła ŭ lutym. Pavodle dakumienta, Glassbel, jakaja źjaŭlajecca viadomym u śviecie vytvorcam architekturnaha škła, treba budzie ašklić kala 10 tys. kv m kompleksu Opera House. Dla hetaha buduć vykarystanyja dvuchkamiernyja škłopakiety z antyblikavym pakryćciom.
Opera House — heta častka zabudovy rajona The Opera District u adnym z samych bahatych emirataŭ AAE. Aficyjna pracy pa ŭźviadzieńni Opera House pačalisia ŭ traŭni minułaha hoda. Opera House, płošča jakoj składaje 300 tys. kv mietraŭ, uklučaje ŭ siabie 66 pavierchaŭ i bolš za 200 šakoŭnych apartamientaŭ. Sam budynak opiery zmoža prymać 2000 čałaviek. Tut buduć prachodzić opiernyja i teatralnyja pastanoŭki, roznyja kancerty, mastackija vystavy, pakazy filmaŭ i inšyja zabaŭlalnyja mierapryjemstvy. Hienieralnym padradčykam prajekta vystupaje kampanija Emaar.
Kampanija Glassbel užo ŭdzielničała ŭ zbudavańni abjektaŭ na Aravijskim paŭvostravie. U pryvatnaści, jaje rašeńni i pradukty byli ŭžytyja pry budaŭnictvie sistemy naviasnych mastoŭ Skywalks u Er-Ryjad (Saudaŭskaja Aravija).
