Fota: park.by
Prajekt Dekreta, što praduhledžvaje pavyšeńnie staŭki padachodnaha padatku dla supracoŭnikaŭ Parka vysokich technałohij, nasamreč padrychtavany, paćviardžaje Minfin.
Fota prajektu apublikavała 19 lutaha hazieta «Kampjutarnyja vieści».
Staŭku padachodnaha padatku dla supracoŭnikaŭ PVT nasamreč prapanujecca padvysić z 9% da 10%. Ale vypłaty ŭ Fond sacyjalnaj abarony nasielnictva pavialičacca ŭ dva razy, a nie ŭ try, jak paviedamlałasia raniej.
Pavieličeńnie padatku abumoŭlenaje nieabchodnaściu zabieśpiačeńnia realizacyi norm Ukaza, što praduhledžvaje vypłatu z 1 studzienia 2015 hoda «siamiejnaha kapitału» šmatdzietnym siemjam.
U suviazi ź nieabchodnaściu farmiravańnia krynicy finansavańnia «siamiejnaha kapitału» z 1 studzienia 2015 hoda pavialičanaja ahulnaja staŭka padachodnaha padatku z 12 da 13 pracentaŭ dla ŭsich katehoryj fizičnych asob, nahadvaje ministerstva. Pavieličeńnie padatku dla PVT «zabiaśpiečvaje sacyjalnuju spraviadlivaść u adnosinach da bolšaj častki hramadzian» — roźnica padatku supracoŭnikaŭ PVT i astatnich hramadzian zastaniecca roŭnaj 3%.
Na dumku ministerstva, pavieličeńnie padatku nie akaža istotnaha ŭpłyvu na ŭzrovień zarpłaty supracoŭnikaŭ PVT, pakolki suma padachodnaha padatku, zychodziačy z pamieru siaredniaj zarabotnaj płaty rabotnikaŭ PVT va ŭmovach 2014 hoda, dla ich pavialičycca ŭ siarednim na 184 tysiač rubloŭ albo ŭ miežach adnoj bazavaj vieličyni.
Pavieličeńnie vypłat u Fond sacyjalnaj abarony, jak śćviardžaje ministerstva, praduhledžvajecca ŭ metach uzmacnieńnia sacyjalnych harantyj hetych rabotnikaŭ.
Toje robicca šlacham pavieličeńnia pamieraŭ vypłat (piensij, dapamoh, u tym liku pa časovaj niepracazdolnaści) sa srodkaŭ dziaržaŭnaha sacyjalnaha strachavańnia.
Lhotny paradak dla rezidentaŭ PVT ŭsio roŭna zachoŭvajecca, nahadvaje ministerstva, bo u dačynieńni da prybytkaŭ astatnich katehoryj hramadzian vierchniaja miaža sum vypłat, što abkładajucca abaviazkovymi strachavymi ŭnioskami, roŭnaja piacirazovaj vieličyni siaredniaj zarpłaty.
***
Navinu ab zdymańni častki lhot supracoŭniki PVT uspryniali ź źniepakojenaściu.
Taki dakumient naškodzić dziaržavie, adznačaje dyrektar «Biełchard» Ihar Mamanienka: kampanii pačnuć zakryvać ubytkovyja prajekty, źmianšać zarpłaty ci znoŭ stanuć sychodzić u cień.
Dyrektar administracyi PVT Valeryj Capkała kazaŭ, što «vyklikaje ździŭleńnie sama stratehija Minfina, nakiravanaja na pieraraźmierkavańnie niekim zaroblenych srodkaŭ, a nie na pošuk novych šlachoŭ i krynic prybytku dla krainy». Jon nahadaŭ, što niaźmiennaść śpiecyjalnaha pravavoha režymu Parku vysokich technałohij harantavanaja Alaksandram Łukašenkam dekretam da 2020 hoda.
