Śpikier Dziaržaŭnaj dumy Siarhiej Naryškin prapanavaŭ kaleham źviarnucca da prezidenta z prośbaj skaracić deputatam zarpłaty ŭ 2015 hodzie. Inicyjatyvu padtrymała i kiraŭnik Savieta Fiederacyi Valancina Maćvijenka.
«Nam pattrebnaja budzie karekciroŭka biudžetu, u tym liku i karekciroŭka kaštarysaŭ raschodaŭ Dziaržaŭnaj dumy. Ja paprasiŭ usie čatyry frakcyi Dziarždumy abmierkavać pytańnie ab mahčymaści skaračeńnia zarpłaty deputataŭ», — skazaŭ Naryškin.
Zhodna z prezidenckim ukazam, z 1 vieraśnia 2014 hoda zarpłata parłamientaryjaŭ składaje krychu bolš za 81 500 rasijskich rubloŭ (kala $1320). Adnak z ulikam nadbavak i premij i paśla vypłaty padatkaŭ deputaty, pa ich słovach, atrymlivajuć kala 340 tysiač rubloŭ (prykładna $5500).
Pa słovach Maćvijenki, havorka idzie ab skaračeńni zarpłaty prykładna na 10%. U asnoŭnym parłamientaryi padtrymlivajuć prapanovu, a ŭ ŁDPR navat vykazali hatoŭnaść achviaravać i bolšuju sumu.
Deputaty ŭ cełym pahadzilisia z tym, što nieabchodna skaračać vydatki. Pry hetym deputat ad frakcyi «Adzinaja Rasija» Franc Klincevič nahadaŭ, što parłamientaryi «taksama chočuć jeści».
«Deputat ža taksama, jak i narmalny čałaviek, taksama choča i jeści, i ŭ jaho siamja jość, i ŭsio astatniaje», — skazaŭ Klincevič.
