 Sinikka Hurskainen |
Sinika Churskajnen (Sinikka Hurskainen) – deputatka Parlamenckaj asamblei Rady Eŭropy ad Finlandyi ačoliła padkamitet ŭ spravach Biełarusi. Jana zamianiła na hetaj pasadzie estonskaha parlamentara Andresa Cherkiela. Termin jahonaha mandatu, jaki byŭ vydadzieny na try hady, skončyŭsia.
Učora ŭviečary zaviaršyłasia abmierkavańnie sytuacyi ŭ Biełarusi na pasiedžańni Palityčnaha kamitetu Parlamenckaj asamblei Rady Eŭropy. Specyjalny dakładčyk pa Biełarusi italjanski parlamentar Andrea Ryhoni zajaviŭ, što alternatyvy dyjalohu niama. Pradstaŭniki biełaruskich uładaŭ u Strasbury kazali, što palitviaźniaŭ u Biełarusi niama, a pradstaŭniki palityčnaj zajavili, što sytuacyja ŭ krainie z pravami čałavieka paharšajecca.
Eksperty, jakija aznajomilisia sa spravazdačaj Andrea Ryhoni, adznačajuć: paraŭnalna z dakładami svaich papiarednikaŭ — Chrystasa Purhurydesa i Andresa Cherkiela jana vyhladaje značna miakčejšaj i bolš strymanaj. Novy dakładčyk u biełaruskich spravach prapanuje i nadalej vieści dyjaloh ź Biełaruśsiu. Chacia i pryznaje, što heta nialohkaja sprava.
Namieśnik staršyni mižnarodnaj kamisii Pałaty pradstaŭnikoŭ Anatol Krasucki ličyć taki padychod pazytyŭnym i spadziajecca, što status specyjalna zaprošanaha, jaki Biełaruś pazbavili jašče ŭ studzieni 1997 hodu, budzie joj viernuty:
«Chaciełasia b adznačyć peŭnyja elementy kanstruktyŭnaści i niekatoraj abjektyŭnaści ŭ dakładzie spadara Ryhoni. I heta śviedčyć pra toje, što udzieł biełaruskaj delehacyi ŭ rabocie Parlamenckaj asamblei nieabchodny. Kab niepasredna danosić da eŭrapiejskich parlamentaroŭ sytuacyju ŭ Biełarusi».
Palitolah Andrej Fiodaraŭ ličyć, što da dyjalohu eŭrapiejskich strukturaŭ ź biełaruskimi ŭładami treba stavicca vielmi aściarožna:
«Kaniečnie, ja zhodny z tym, što treba praciahvać dyjaloh. Ale treba kłapacicca i pra toje, kab heta nie pierarasło ŭ paturańni ŭładam. Kali dyjaloh budzie praciahvacca, a ŭ Biełarusi buduć sadžać ludziej u turmy, dyk heta, na moj pohlad, budzie tolki na ruku biełaruskim uładam».
A Vincuk Viačorka, jaki niepasredna ŭdzielničaŭ va ŭčorašniaj dyskusii ŭ Strasbury źviartaje ŭvahu na toje, jak razumiejuć dyjaloh pradstaŭniki biełaruskich uładaŭ i jak heta prahučała ŭ vystupie Natalli Andrejčyk, jakaja vykładała na pasiedžańni aficyjny pohlad:
«Im chočacca dyjalohu z Parlamenckaj Asamblejaj Rady Eŭropy, z Radaj Eŭropy. Ale ni ŭ jakim razie nie z ułasnym narodam i nie z demakratyčnymi siłami. Adzinaje słova, jakoje hučała ŭ spadaryni Andrejčyk, heta — chulihany na vulicy. Pryznacca, vielmi škada, što takaja tanalnaść znoŭ pačynaje panavać.
Ja skazaŭ, što byli niekatoryja spadzievy (moža, nia stolki ŭ samoj Biełarusi, kolki za jaje miežami) letaś — uviesnu i ŭvosień, što mahčyma niejkaje prasoŭvańnie pa šlachu źmiakčeńnia palityčnych varunkaŭ. Ale siońnia, paśla studzieńskich i śniežańskich padziejaŭ, nie vypadaje havaryć, pra źmiakčeńnie staŭleńnia da Biełarusi».
U ramkach dyskusii nijakich vynikovych dakumentaŭ nie prymałasia. Spadar Ryhoni skazaŭ, što ŭ chutkim časie jon źbirajecca znoŭ pryjechać u Biełaruś.
