Pra heta paviedamili ŭ pres-słužbie Ministerstva lasnoj haspadarki.
Pieršymi narychtoŭku soku tradycyjna pačali lashasy Bresckaj i Homielskaj abłaściej. Pry spryjalnym nadvorji chutka da ich dałučacca i astatnija rehijony respubliki.
Abjomy narychtovak biarozaviku dla pramysłovaj pierapracoŭki ŭzhodnienyja z patrebnaściami kansiervavych zavodaŭ i pierapracoŭčych pradpryjemstvaŭ. Štohod kolkaść zahatoŭki soku raście. Tak, u 2013 hodzie było narychtavana 14,9 tys. ton, u 2014-m — 19,8 tys. Płan na 2015 hod — 24 tys. ton napoju.
Jak adznačyli ŭ viedamstvie, z pačatkam siezona narychtoŭki biarozaviku dziaržaŭnaja lasnaja achova asablivuju ŭvahu nadaje achovie biarozavych hajoŭ i źmiešanych lasoŭ, dzie rastuć śpiełyja biarozy, bo samavolnaja narychtoŭka soku biez dazvolnych dakumientaŭ u respublicy zabaroniena.
Pavodle pravił narychtoŭki druharadnych lasnych resursaŭ i ažyćciaŭleńnia pabočnaha karystańnia, narychtoŭvać biarozavik možna tolki ŭ pierastojnych i śpiełych lasach, pryznačanych dla vysiečak hałoŭnaha karystańnia. Ale nie bolš čym za piać hadoŭ da ich vysiečki i sposabami, jakija nie mohuć nanieści škodu drevam. Dla pramysłovaj narychtoŭki biarozaviku nieabchodna nabyć lasny bilet i atrymać dazvoł ad lashasa. Laśnictva vyznačyć peŭnyja ŭčastki narychtoŭki.
U laśnictvach vyznačanyja ŭčastki lesu, pryznačanyja dla narychtoŭki biarozaviku hramadzianami dla ŭłasnych patreb. Usie achvotnyja narychtavać sok pavinny źviarnucca ŭ laśnictva. Śpiecyjalisty pakažuć śpiecyjalna adviedzienyja dla zboru soku ŭčastki, praviaduć instruktaž i prakantralujuć technałohiju padsočki. U laśnictvach možna budzie nabyć i narychtavany sok. «Ceny zastanucca prymalnymi», — adznačyli ŭ pres-słužbie.
Za parušeńnie pravił narychtoŭki soku praduhledžana administracyjnaja adkaznaść.
Zakanadaŭstvam vyznačany terytoryi, na jakich narychtoŭka sokaŭ zabaraniajecca. Da ich adnosiacca: haradskija, kurortnyja lasy i lesaparkavyja častki zialonych zon; prybiarežnyja pałosy rek, azior, vadaschoviščaŭ i inšych vodnych abjektaŭ; pałosy advodu žaleznych i aŭtamabilnych daroh, inšych transpartnych i kamunikacyjnych linij; nasielenyja punkty; dendrałahičnyja parki, bataničnyja sady; historyka-kulturnyja zapaviedniki, miemaryjalnyja parki, archieałahičnyja pomniki; miescy raśsialeńnia dzikich žyvioł i rostu dzikarosłych raślin, adniesienych da vidaŭ, uklučanych u Čyrvonuju knihu Respubliki Biełaruś; terytoryi sanatoryjaŭ, damoŭ adpačynku, kurortaŭ i ŭstanoŭ achovy zdaroŭja, a taksama akruhi i zony sanitarnaj achovy kurortaŭ; miescy masavaha adpačynku nasielnictva.