U Słucku pašancavała tolki trom mahistralnym vulicam, dziakujučy vysiłkam tahačasnaha staršyni harvykankamu. Vulicy Ŭryckaha viarnuli staradaŭniuju nazvu Kapylskaja, a Vaładarskuju pieranazvali ŭ vulicu Maksima Bahdanoviča, bo na hetaj vulicy ŭ kancy XVIII st. znachodziłasia fabryka pa vyrabie słavutych słuckich załatych pajasoŭ. Vulicy Karła Libknechta, niamieckaha kamunista, viarnuli darevalucyjnuju nazvu — Vilenskaja. Na tym i spynilisia.
Biaź źmieny zastalisia Akciabrskaja, Najabrskaja, Kamsamolskaja, Savieckaja, Lenina. Praŭda, u 1980‑ia, z rekamendacyi piśmieńnikaŭ Słuččyny (a jana na ich bahataja), źjavilisia vulicy Kuźmy Čornaha, Janki Kupały, Jakuba Kołasa, Antosia Aleški. Ale ž jašče zastałosia stolki vartych imionaŭ: Aleś Viečar, Jurka Haŭruk, Jazep Dyła, Ściapan Lichadzijeŭski, Mikoła Łoban, Alhierd Abuchovič, Aleś Kułakoŭski, Ryhor Krušyna, Janka Zołak, Uładzimier Kliševič. A chiba nie zasłužyli taho, kab ichnymi imionami nazvali vulicy horadu, arhanizatary Słuckaha zbrojnaha čynu 1920‑ha hodu — Vasil Rusak, Jurka Listapad, jakija zahinuli ŭ HUŁAHu?
Niaźmiennymi zastajucca nazvy‑paradoksy Słucku: vulicy Kutuzava, Suvorava, Nachimava, Chmialnickaha, Kalinina, Kirava, Čkałava. Źjavilisia ŭ novych mikrarajonach vulicy Puhačova, Ržanaja (pa‑biełarusku tre było b «Žytniovaja»), Sierpuchaŭskaja (horad Sierpuchaŭ staŭ pabracimam Słucku). Tak i adčuvajecca va ŭsim hetym pakłon «starejšamu bratu» na ŭschodzie.
U tapanimičnym tupiku apynulisia i žychary vulicy 1 žniŭnia. Nichto z žycharoŭ hetaje vulicy nia viedaje, što takoje zdaryłasia ŭ hety dzień…
