Alaksiej Kaleśničenka. Fota z «Ukantakcie».
U lutym navukovy supracoŭnik Hieałahičnaha instytuta Rasijskaj AN, kandydat hieołaha-minierałahičnych navuk Alaksiej Kaleśničenka ŭ lutym pajechaŭ u padarožža, jak ruskija kažuć, «pa bližnim zamiežžy».
«U Biełarusi ja byvaŭ nie adnojčy. Hetym razam ja zajechaŭ z poŭnačy, praz Połack trapiŭ u Minsk, zatym nakiravaŭsia ŭ Hrodna, Śvisłač, Baranavičy, Lachavičy, Babrujsk i Homiel. Z Homiela na dva dni jeździŭ u Kijeŭ».
23 lutaha Alaksiej pryjechaŭ z Kijeva ŭ Biełaruś. U hety ž dzień jaho i zatrymali.
«A 4 ranicy ja na ciahniku pryjechaŭ u Homiel z Kijeva. Pahulaŭ pa centry hadziny paŭtary, pasiadzieŭ u kaviarni da jaje zakryćcia a 6 ranicy, źjeŭ dva ź piaci buterbrodaŭ, jakija napiaredadni mnie padrychtavaŭ siabar u Kijevie, i mianie paniesła dalej. Bližnim bujnym horadam na šlachu byŭ Łojeŭ, u 100 km na poŭdzień ad Homiela. Nastupnym horadam na maim turystyčnym šlachu pavinien byŭ stać Brahin, jaki raniej uvachodziŭ u Čarnobylskuju zonu adčužeńnia, ale moj dalejšy los skłaŭsia inakš», — raskazvaje Alaksiej.
U Łojevie jon fatahrafavaŭ «usio zapar». U abjektyŭ kamiery Alaksieja trapiła i Łojeŭskaje AUS.
«Na hadzińniku było roŭna 9:00, kali ŭ Łojevie da mianie padyšli dvoje milicyjantaŭ i paprasili pradjavić pašpart. Ja pradjaviŭ svoj rasijski pašpart, paśla čaho mnie prapanavali prajści ŭ adździaleńnie ŭnutranych spraŭ. Ja prajšoŭ, mianie prabili pa bazie źviestak i byccam by hatovy byli ŭžo adpuścić, ale ŭźnikła nieabchodnaść pahavaryć z načalnikam AUS.
Čakać jaho pryjšłosia 3,5 hadziny. Praź niekatory čas paśla taho, jak jon pryjechaŭ, mianie pravodzili ŭ jaho kabiniet na druhim paviersie i pačałasia razmova.
«Navošta pryjechali, kolki dzion znachodziciesia ŭ Biełarusi, navošta jeździli va Ukrainu, ŭ jakich haradach byli» — heta kala 2% pytańniaŭ, jakija jon mnie zadaŭ chvilin za 40 znachodžańnia ŭ jaho kabiniecie», — apisvaje zatrymańnie Kaleśničenka.
Na kamiery-«mylnicy» Alaksieja, akramia zdymkaŭ Łojeŭskaha AUS, znajšlisia i zdymki vakzałaŭ, aeraportaŭ, samalotaŭ. Alaksiej śćviardžaje, što zachaplajecca avijacyjaj, źjaŭlajecca vałancioram u muziei avijacyi ŭ Monina i biare ŭdzieł u adnaŭleńni savieckaha łajniera Tu-144.
Paśla z Alaksiejem vyrašyli pahutaryć supracoŭniki miascovaha adździaleńnia KDB. U adroźnieńnie ad milicyjantaŭ, pa słovach Alaksieja, tyja pravodzili dopyty prafiesijna.
Usiaho KDB zładziŭ niekalki dopytaŭ Alaksieja — adzin navat, pa jaho słovach, z prymianieńniem detektara chłuśni.
Sam Kaleśničenka kaža, što supracoŭniki KD tak i nie damahlisia ad jaho ničoha i addali jaho nazad milicyjantam. Tyja skłali na taho pratakoł za niecenzurnuju łajanku ŭ hramadskim miescy, i ŭ vyniku Alaksieja asudzili na 10 sutak pa atrykule 17.1 Administracyjnaha kodeksa Biełarusi. Na volu jon vyjšaŭ 5 sakavika.
Alaksiej kaža, što ničoha padobnaha ź im nikoli nie zdarałasia.
Alaksiej kaža, što chacieŭ by paskardzicca, ale nie viedaje, ci budzie heta rabić: «U izalatary časovaha ŭtrymańnia sukamiernik paraiŭ napisać zajavu ŭ hienprakuraturu ŭ Rasii, ale, pa-pieršaje, u mianie niama kopii prysudu suda, a pa-druhoje, kali sprava pojdzie, to pryznačać sud u Homieli i mnie daviadziecca tudy jechać i chto viedaje, što tam sa mnoj budzie. Mohuć jašče što-niebudź prypisać. U Biełaruś u bližejšy čas nie pajedu».
Paciarpieli ŭsie
U vyniku zatrymańnia Kaleśničenki paciarpieŭ nie jon sam, a i ŭsie biełarusy. Praz toje, što 23 lutaha hramadzianin Rasii ŭ Łojevie zdymaŭ administracyjnyja budynki, 25 lutaha namieśnik ministra unutranych spraŭ Mielčanka 25 lutaha vydaŭ rasparadžeńnie, jakoje abaviazvaje pilna stavicca da tych, chto fatahrafuje administracyjnyja budynki.
Pieršaj achviaraj staŭ fotakarespandent «Kamsamolskaj praŭdy ŭ Biełarusi» Dźmitryj Łaśko. Jaho na 4 hadziny zatrymali za toje, što jon rabiŭ fotazdymki novaj padśvietki hałoŭnaha korpusa Akademii navuk. A 7 sakavika ŭ Iŭje za fatahrafavańnie administracyjnych budynkaŭ zatrymali hrupu błohieraŭ ź Minska.
Pres-słužba MUS u kamientary BiełTA patłumačyła, što pravaachoŭniki majuć prava viedać ab mecie fatahrafavańnia administracyjnych budynkaŭ, ale ab zabaronie na zdymki havorka nie idzie.
