Spačatku Vasil Žarko ŭzhadaŭ pośpiechi ŭ stabilizacyi demahrafičnaj situacyi ŭ Biełarusi:
«My nablizilisia da zmykańnia demahrafičnych nažnic. Kaeficyjent naturalnaha źmianšeńnia nasielnictva skłaŭ -0,3 na tysiaču čałaviek. A ŭ Minskaj i Bresckaj abłaściach nazirajecca rost nasielnictva.
U apošnija try hady śmiarotnaść ludziej pracazdolnaha ŭzrostu źniziłasia ad 3,3% u Minskaj da 8% u Hrodzienskaj vobłaści, (…) a pa dziciačaj śmiarotnaści (4,6 na 1000) my lepšyja siarod krain SND i apieradžajem Bielhiju, Hiermaniju, Niderłandy», — skazaŭ jon.
Praź dziaržaŭnuju prahramu rańniaha vyjaŭleńnia raku kolkaść vyjaŭlenych ankałahičnych chvorych padčas prafiłaktyčnych ahladaŭ pavialičyłasia na 20%. Pry hetym śmiarotnaść ankachvorych źniziłasia, a 5-hadovaja vyžyvalnaść pavysiłasia.
Pavodle ministra, pa ŭzroŭni dastupnaści miedycynskaj dapamohi Biełaruś zajmaje adno ź pieršych miescaŭ u śviecie, dzielačy jaho z Brunejem i Kanadaj.
Jašče adnoj haračaj temaj dla abmierkavańnia stała pastanova №66 Ministerstva achovy zdaroŭja ab paradku vodpusku recepturnych preparataŭ.
Žarko ŭchvaliŭ vyniki pastanovy, skazaŭšy, što patok ludziej u apteki źniziŭsia, a «zapasy antybijotykaŭ bolš nie lažać u šafach»: «Nie farmaceŭty, znajomyja i internet musiać zajmacca lačeńniem, a ŭrač. Hałava moža baleć ad stomlenaści, ad stresu, ad mihreni, a moža być pieradinsultny stan, a moža być puchlina».
Žarko paviedamiŭ, što «99% dziaržaŭnych i kamiercyjnych aptek vykonvajuć pastanovu sumlenna».
Adnak za parušeńni paradku vodpusku lekaŭ tolki ŭ 2015 hodzie Minzdaroŭja prypyniła pracu kala 20 aptek.
Ministr taksama zajaviŭ, što adnoj z hałoŭnych zadač Ministerstva achovy zdaroŭja zrabić leki dastupnymi dla biełarusaŭ.
U 2014 hodzie dola biełaruskich preparataŭ, zakuplenych Ministerstvam achovy zdaroŭja, skłała 37%. Adnak Łukašenka pastaviŭ pierad ministerstvam zadaču davieści hety pakazčyk da 50%, na što i budzie nakiravana praca 28 biełaruskich farmaceŭtyčnych pradpryjemstvaŭ. Tolki ŭ hetym hodzie płanujecca vypuścić bolš za 100 najmieńniaŭ lekaŭ biełaruskaj vytvorčaści, a vialiki akcent budzie zrobleny na vyrab ajčynnych ankapreparataŭ.
Pry hetym Žarko zapeŭniŭ, što vybar vytvorcy zastajecca za pacyjentam:
«Kali chtości dumaje, što my prymušajem daktaroŭ vypisvać biełaruskaje, heta nie tak. Kali dla biaspłatnaha recepta, čamu b nie vypisać biełaruskaje, kali jość biełaruski preparat naležnaj jakaści, a jany ŭsie jakasnyja. U aptekach nie mohuć pradavacca niajakasnyja leki: jany ŭsie, jak i biełaruskija, tak i zamiežnyja, praviarajucca ŭ łabaratoryi adnolkava.
Ale kali u čałavieka jość pakazańni ci jon ŭsio žyćcio prymaje niejki zamiežny preparat, jamu vypišuć zamiežny preparat».
Žarko raskazaŭ i pra kroki pa aptymizacyi pracy ŭstanoŭ achovy zdaroŭja, u pieršuju čarhu paliklinik. Pavodle jaho mierkavańnia, hałoŭnaje ŭ pracy paliklinik — pravilnaja arhanizacyja pracy:
«Kali pracoŭny dzień kiraŭnik palikliniki budzie pačynać z analizu papiaredniaha dnia: jak, što, adkul. Bo bolšaść vyklikaŭ uzimku, kali adbyvajecca pik zachvorvańniaŭ. Uletku niama vyklikaŭ. I voś zastajecca dzieviać miesiacaŭ. Zajmiciesia ŭ hety čas abśledvańniem ludziej. I kali budzie takoje dynamičnaje nazirańnie ŭčastkovymi daktarami, źnizicca zachvorvajemaść, źnizicca časovaja niepracazdolnaść, źnizicca śmiarotnaść».
Žarko paviedamiŭ, što płanujecca da kanca hoda zaviaršyć adzin z etapaŭ infarmatyzacyi paliklinik, jaki dapamoža razhruzić ustanovy.
U Minsku zapuściać elektronnyja recepty, zapis praź Internet va ŭsich paliklinikach. U astatnich rehijonach elektronnyja recepty buduć uviedzieny, kali finansavańnie budzie vydzielena ŭ poŭnym pamiery. Elektronny recept budzie vypisvacca doktaram, i jaho ŭ aptecy buduć znachodzić pa bazie.
A voś elektronnyja karty možna budzie čakać tolki ŭ nastupnym hodzie.
Taksama ŭ Biełarusi budzie pašyracca instytut daktaroŭ ahulnaj praktyki:
«Bolš za pałovu viaskovych ambułatoryj pracujuć pa pryncypie daktaroŭ ahulnaj praktyki. Heta terapieŭty, jakija prajšli pierapadrychtoŭku i majuć bolš pahłyblenyja viedy. I kali da takoha ŭrača prychodzić čałaviek z anhinaj, atytam ci chvoraj śpinaj, jamu nie treba jechać u balnicu da nieŭrołaha, ŁORa, akulista — jaho lečać na miescy. Pryniata rašeńnie, kab učastkovyja terapieŭty praz 2-3 hady pracy i kursu pierapadrychtoŭki pracavali jak daktary ahulnaj praktyki».
A voś čutki pra mahčymaje pavieličeńnie terminu adpracoŭki studentaŭ-miedykaŭ Žarko abvierh:
«Adpracoŭvajuć piać hadoŭ tyja, chto vučycca pa metavym nabory za srodki. Kali budzie metavy nabor štohod 40% u VNU i 60% u SSNU, heta zabiaśpiečyć patreby sistemy achovy zdaroŭja».
