Supracoŭniki adździaleńnia patrulna-pastavoj słužby Kryčaŭskaha AUST zatrymali hramadzian Ukrainy, jakija pieravozili ŭ dyziel-ciahniku bolš za 500 kh sała, paviedamili va UUS Mahiloŭskaha abłvykankama.
Pravaachoŭniki, jakija supravadžali ciahnik rehijanalnych linij ekanomkłasa №6546 Suraž—Kryčaŭ, źviarnuli ŭvahu na mužčynu i žančynu ź vialikim bahažom — 12 vialikich haspadarčych sumak i polietylenavy pakiet. Padčas ahladu bahažu było ŭstanoŭlena, što pasažyry vieźli ŭ torbach salonaje i vendžanaje sała.
Jak vyśvietliłasia, mužčyna i jaho darosłaja dačka, jakija pastajanna pražyvajuć u Čarkaskaj vobłaści, vieźli sała dla realizacyi ŭ Biełarusi.
Jany dabralisia da Branska, zatym na spadarožnym transparcie dajechali da horada Suraž. Taki maršrut (praz Rasijskuju Fiederacyju) hramadzianie vybrali nie vypadkova: bajalisia pazbavicca bahažu pry dahladzie na biełaruska-ŭkrainskaj mytni.
Pakolki akramia pašpartoŭ ŭ hramadzian Ukrainy pry sabie nijakich dakumientaŭ nie było, ich razam z bahažom vyrašana było vysadzić na stancyi dysłakacyi AUST.
Dvanaccać sumak vahoj ad 35 da 50 kh u pasažyraŭ kanfiskavali. Bolš za 513 kh sała było ŭtylizavana.
Zhodna z pastanovaj Savieta Ministraŭ ad 29 žniŭnia 2013 hoda №758 «Ab dadatkovych mierach pa niedapuščeńni raspaŭsiudžvańnia afrykanskaj čumy śviniej i inšych niebiaśpiečnych zachvorvańniaŭ žyvioł», zabaroniena pieravozić sała pa terytoryi krainy biez abaviazkovych dakumientaŭ, vydadzienych Departamientam vieterynarnaha i charčovaha nahladu Minsielhascharča Biełarusi.
U adnosinach da ŭkraincaŭ składzieny pratakoł pa art.15.38 č.1 KaAP. Parušeńnie vieterynarnych, vieterynarna-sanitarnych abo zaatechničnych pravił ciahnie papiaredžańnie abo nakładańnie štrafu ŭ pamiery da dvaccaci bazavych vieličyń.
