Lehiendarny chakieist Pavieł Bure daŭ intervju rasijskaj «Ekspres-haziecie». Pamiž inšaha, uzhadaŭ i pra Alaksandra Łukašenku.
— Njadaŭna vy hulali ŭ chakiej u adnoj trojcy z Uładzimiram Pucinym. Jak heta — vychodzić na lod z prezidentam Rasii?
— Heta vielizarny honar. Uładzimir Uładzimiravič varty zachapleńnia. Pry takim napružanym hrafiku prezident pastaviŭ pierad saboj metu — navučycca hulać u chakiej, treniravaŭsia. I ja pamiataju, što ŭ traŭni minułaha hoda Pucin u adnoj hulni zakinuŭ šeść šajbaŭ! Heta było ŭ Sočy, u hała-matčy Načnoj chakiejnaj lihi, skaročana - NCHŁ.
— Heta što za liha?
— U joj paśla pracy hulajuć chakieisty-amatary. Kali ja byŭ maleńkim, dziadziečki z našaha dvara źbiralisia ŭ čyim-niebudź haražy i pili harełku. A zaraz u chakiej hulajuć.
Ja vystupaŭ u adnoj trojcy i ź inšym prezidentam — Alaksandram Łukašenkam. Jon taksama lubić chakiej. Adnojčy, kali Alaksandr Ryhoravič znachodziŭsia z aficyjnym vizitam u Maskvie, jon papiaredziŭ, što paśla sustrečy ź Jelcynym choča zajechać da mianie. Hladžu, z ranicy ŭ našym rajonie evakuiravali ŭsie mašyny, jakija pryparkavalisia ŭzdoŭž daroh.
Łukašenka padniaŭsia na čaćviorty pavierch pieššu, choć jaho achova pierad hetym zachodziła ŭ lift i ŭsio tam pravieryła. Tady ja žyŭ u inšaj kvatery — płoščaj 100 kvadratnych mietraŭ. Mnie jana zdavałasia prastornaj, ale Łukašenka skieptyčna jaje ahledzieŭ i skazaŭ: «I ty tut žyvieš?! Nie šanuje ciabie Barys Mikałajevič. Ja b tabie ŭ Minsku dom padaryŭ».
— Vy byli ŭ rezidencyi Łukašenki?
- Tak. Haściavaŭ na jaho zaprašeńnie. Alaksandr Ryhoravič prapanavaŭ ranicaj vyjści na łyžniu — prabiehčy navypieradki 10 kiłamietraŭ. Ja tady za akijanam u NCHŁ hulaŭ, byŭ u poŭnym paradku, nie sumniavaŭsia, što vyjhraju. Ja bieh pa-staromu, kłasičnym stylem, i praz čatyry kiłamietry syšoŭ z dystancyi. Ruki aniamieli. A Łukašenka asvoiŭ kańkovy chod i lohka dajechaŭ da finišu. Dobra, my nie paspračalisia pierad startam.
* * *
Pavieł Bure naradziŭsia ŭ Minsku ŭ 1971 hodzie, jaho maci biełaruska.
Jon byŭ adnym z samych papularnych i paśpiachovych chakieistaŭ ŭ 1990-yja, atrymaŭ mianušku «Ruskaja rakieta». U siezonach 1993/1994, 1999/2000 i 2000/2001 stanaviŭsia najlepšym snajpieram čempijanataŭ NCHŁ.
Ahułam u najmacniejšaj chakiejnaj lizie śvietu jon pravieŭ 766 hulniaŭ, u jakich nabraŭ 849 ačkoŭ (472 šajby + 377 pieradač) — u siarednim bolš čym ačko za hulniu!
U 34 hady Bure byŭ vymušany skončyć karjeru praz chraničnuju traŭmu kalena.
