U horadzie-hieroi Pieciarburhu sustrelisia apošnija siabry Rasiei. Zusim bieź siabroŭ, u sucelnym kole vorahaŭ, niachaj i z Krymam, žyćcio akazałasia ŭsio ž taki nie takim sałodkim, jak jałcinskaja cybula.
Hrošaj mała, kredytu niama, i navat upeŭnienaść u svaim sakralnym pravie hnuć susiedziaŭ pastupova sychodzić. Sprabavali siabravać z kitajcami, ale tyja raptam złačynna zajavili, što pavažajuć terytaryjalnuju cełasnaść Ukrainy. Kudy biednamu impiercu padacca, dzie vietlivuju hałavu schilić? Tut volaj-niavolaj ŭspomnili pra jeŭrapiejskija kaštoŭnaści, ale - asablivyja. Isnujuć, viedajecie, u Jeŭropie takija śpiecyjalnyja ludzi z asablivaściami. Pratestujuć pastajanna, vykazvajuć svaju niazhodu z bolšaściu. Nazyvajucca - nieanacysty.
Nasamreč, z kim jašče nam ciapier siabravać? Ultrapravyja suprać falšyvych kaštoŭnaściaŭ libieralnaj demakratyi, i my suprać. Jany suprać buržuaznaha indyvidualizmu, i my tut ža. Jany zmahajucca suprać materyjalizmu i abyvacielaŭ, a hałoŭnyja rasijskija myślary padkidvajuć pasilnuju kolkaść arhumientaŭ. Jany rasisty, ksienofoby i hamafoby, nu i my troški ŭ hetym kirunku pracujem.
Ni ŭ kaho ŭ śviecie nieviadomych tradycyjnych kaštoŭnaściaŭ niama, a ŭ nas ź imi jość. Nu, moža być, jašče ŭ isłamistaŭ jość usio, što nam treba, kab razam pajści suprać Zachadu. Ale isłamisty čamuści pakul nie pryznajuć u nas svaich, bić statui nie zaprašajuć i kryŭdna nazyvajuć kafirami. A hetyja adrazu pryznali ŭ nas svaich, padtrymali i Krym, i Navarosiju, i na vybarach usio, što treba nazirać, nazirali (pamiatajecie, «Jobik»?). Heta siabry našy.
I voś 22 sakavika ŭ hateli Holiday Inn u kanfierenc-zale «Piatroŭ-Vodkin» prachodzić Mižnarodny ruski kansiervatyŭny forum, dzie, bieź pierabolšańnia, źbirajecca ŭvieś koler aryjskaj rasy. Jość tut vajskova-patryjatyčnyja hreki z «Załaty zary», hetkija Kvačkovy z Ełady, źvichnutyja na nacyjanalnaj vieličy. Jość kaardynatary bajavikoŭ-nacyjanalistaŭ ź ES, jakija vajujuć va Ukrainie na baku «DNR». Kałarytnyja nacysty-šviedy z raspuščanaha ŭ 2008 hodzie Nacyjanał-sacyjalistyčnaha frontu.
Nacysty z usioj Zachodniaj Jeŭropy i navat adzin ultrapravy deputat Jeŭraparłamienta z Hiermanii. Usiaho adzinaccać arhanizacyj, najvyšejšaje fašysckaje hramadstva, arystakratyja zbrodu. Nu i prymajučy rasijski bok adpaviedny. Asoby ŭsie viadomyja, mažnyja i tradycyjnyja.
Atrymlivajecca zahadkavaja reč. Siamidziesiacihodździe pieramohi ŭ vialikaj vajnie, Rasija, jakaja całkam składajecca z antyfašystaŭ, pravažajučych, jak niadaŭna ŭ Jekaciarynburhu, dobraachvotnikaŭ «bić fašystaŭ» i nakrytaja hieorhijeŭskaj stužačkaj, - heta z adnaho boku. Haściavy domik dla nieanacystaŭ, mižnarodnaja kanfierencyja synoŭ aryjskaj rasy, antysiemitaŭ i našych siabroŭ u horadzie, jaki pieražyŭ błakadu, - z druhoha.
Ułasna, z usich jeŭrapiejskich ultrapravych na źlot u Pieciarburh, zdajecca, zabylisia zaprasić tolki ŭkrainskich. Tak, moža być, vykažam niebiaśpiečnuju dumku, sprava tam zusim nie ŭ Bandery?
Rasijskaje hramadstva adciahnułasia na kryki ab kijeŭskaj chuncie i ŭpuściła toj momant, kali stała udzielnikam vialikaj mižnarodnaj nieanacysckaj kanfierencyi ŭ zale «Piatroŭ-Vodkin».
Farmalnym arhanizataram źlotu našych apošnich siabroŭ źjaŭlajecca «Ruski nacyjanalny kulturny centr - Narodny dom». Ale pa fakcie ź siabrami pracuje partyja «Radzima», jakaja isnuje pad pratekcyjaj vice-premjera Rahozina. Da 2016 hoda «Radzima» moža stać adnym z hałoŭnych sajuźnikaŭ i vyratavalnikaŭ «Adzinaj Rasiei» na vybarach u Dziarždumu. Sajuźnikam sprava.
