24 sakavika ŭ filijale Dziaržaŭnaha muzieja historyi biełaruskaj litaratury «Litaraturny muziej Maksima Bahdanoviča» ŭ Minsku prajšło ŭručeńnie premii dla maładych piśmieńnikaŭ «Debiut». Pieramožcami ŭ naminacyjach «proza» i «paezija» stali, adpaviedna, Alaksiej Pałačanski i Taćciana Niadbaj.
Šort-list premii byŭ abjaŭleny napačatku sakavika. U naminacyi «Proza» tudy trapili knihi apaviadańniaŭ Vitala Voranava «Šeptam», Alaksieja Pałačanskaha «Moj ćvik», a taksama vydańnie Ramana Śviečnikava ź pieršaj častkaj dziońnikaŭ padarožnika «Roma jedzie», jakija źviarnuli na siabie ŭvahu internaŭtaŭ.
Zała litaraturnaha muzieja Maksima Bahdanoviča akazałasia poŭnaściu zaniataja prysutnymi. Paśla pramovy-adkryćcia premii ad Andreja Chadanoviča, słova ŭziaŭ jaje fundatar — miecenat Pavieł Bierahovič. Uschvalavana jon paviedamiŭ, što ŭ hetym hodzie žury pracavała ŭ novym farmacie i jon vielmi rady, što vyniki premii abviaščajucca mienavita ŭ muziei biełaruskaha kłasika imiem jakoha jana i nazvana. Taksama Bierahovič uzhadaŭ Hienadzia Buraŭkina, Lavona Barščeŭskaha, Uładzimiera Niaklajeva — usich tych, «chto pracavaŭ u składzie žury ŭ minułyja hady».
Siabroŭka žury premii zahadčyca muzieja imia Maksima Bahdanoviča Maryna Zapartyka pryvitała ŭsich udzielnikaŭ i skazała što ŭručeńnie takoj premii ŭ budynku muzieja pavinna stać dobraj tradycyjaj.
Udzielnikaŭ šort-lista premii «Debiut» abjaŭlaŭ Andrej Chadanovič. Uryŭki sa svaich knih pieršymi vyjšli pračytać prazaiki.
Strymana pračytaŭ uryvak sa svajoj knihi Vital Voranaŭ.
Alaksiej Pałačanski čytaŭ svoj «Moj ćvik» dosyć spakojna i razvažliva.
Roma Śviečnikaŭ nie staŭ čytać uryŭkaŭ, a raspavioŭ karotkija historyi z padarožžaŭ, padziakavaŭ za vyłučeńnie ŭ šort-list i skazaŭ, što nichto b z nastaŭnikaŭ nikoli nie pavieryŭ by, što jon napiša knihu, bo vučyŭsia jon drenna.
Paśla vystupu Romy, Andrej Chadanovič pažadaŭ jamu adkryvać dla siabie novy dośvied, a najpierš dośvied razmovy na biełaruskaj movie.
Kanviert ź imieniem pieramožcy ŭ naminacyi «Proza» raśpiačataŭ Barys Piatrovič. Tam było napisana dva słovy — Alaksiej Pałačanski. Choć napiaredadni ŭsie prahnazavali, što ŭhanaravany budzie Śviečnikaŭ.
Alaksiej Pałačanski atrymaŭ pieršuju ŭ svaim žyćci litaraturnuju premiju.
Za atrymańnie premii ŭ naminacyi «Paezija» zmahalisia Taćciana Niadbaj sa svajoj debiutnaj knihaj «Sireny śpiavajuć džaz», Anton Rudak sa zbornikam «Vierchni horad» i Julija Cimafiejeva z «Knihaj pamyłak».
Pieramožcu ŭ hetaj naminacyi abjaŭlali Uładzimir Arłoŭ i Pavieł Bierahovič. Arłoŭ kazaŭ, što rašeńnie dałosia vielmi ciažka, bo ŭsie knihi aŭtaraŭ-naminantaŭ «vielmi doŭha i aściarožna ŭzvažvalisia». U vyniku ŭ raśpiačatanym kanviercie było napisana imia Taćciany Niadbaj. Na ŭručeńnie dypłoma i siertyfikata jana vyjšła ŭzrušanaj i nie chavała radasnaj uśmieški. Iznoŭ ža, «huru» napiaredadni schilalisia da taho, što šancy Rudaka j Cimafiejevaj vyšejšyja.
Taćciana Niadbaj — tonki liryk, u tvorach jakoj spałučajucca navatarstva i tradycyjanalizm.
Arhanizatary premii ŭ hetym hodzie vyrašyli nie vyznačać pieramožcaŭ ŭ naminacyi «Pierakład».
Sioleta ŭ skład žury ŭvachodzili 7 čałaviek: Uładzimir Arłoŭ, Pavieł Bierahovič, Alena Hušča, Maryna Zapartyka, Aleś Paškievič i łaŭreaty premii «Debiut» 2013 hoda pierakładčyca Kaciaryna Macijeŭskaja i paet Uładź Lankievič.
Kožny z łaŭreataŭ premii atrymali pryzy ŭ vyhladzie čekaŭ na 30 młn biełaruskich rubloŭ ad dabračynnaha fondu «Viartańnie», jaki zarhanizavaŭ ajčynny miecenat Pavał Bierahovič.
Zała pałaca była zapoŭnienaja całkam.
Miecenat Pavieł Bierahovič prezientuje hrašovy siertyfikat na 30 młn.
Premiju «Debiut» funduje Pavieł Bierahovič.
Maryna Zapartyka i Barys Piatrovič (u pieršym šerahu), Anton Rudak (u druhim šerahu ŭ centry).
Vital Voranaŭ.
Roma Śviečnikaŭ pryjechaŭšy.
Alaksiej Pałačanski.
Anton Rudak.
Premiju atrymlivaje Alaksiej Pałačanski.
Julija Cimafiejeva.
Uładzimir Arłoŭ (sprava) i Andrej Chadanovič.
Pamiatnaja statuetka premii «Debiut».
Premiju atrymlivaje Taćciana Niadbaj.
Štohadovaja premija «Debiut» była zasnavanaja ŭ 2010 hodzie Biełaruskim PEN-centram i Sajuzam biełaruskich piśmieńnikaŭ pry padtrymcy biźniesoŭca Paŭła Bierahoviča. Premija ŭručajecca aŭtaram, jakim nie bolš za 35 hadoŭ, za najlepšyja debiutnyja tvory ŭ žanrach prozy, paezii i mastackaha pierakładu. Pieramožcami premii ŭ minułyja hady ŭ roznych naminacyjach byli Viktar Marcinovič, Vital Ryžkoŭ, Andrej Adamovič, Julija Šarova, Hanna Jankuta, Hleb Łabadzienka, Kacryna Macijeŭskaja i inšyja.
