Usio pačałosia jašče ŭ 2000. Tady trenier-lohkaatlet Alaksiej Vaskabovič dabudavaŭ svoj dom na vulicy Umanskaj. Ale heta treba ŭzhadnić u administracyi Maskoŭskaha rajona.
«Mnie tam prapanavali: uzhodnim, a vy akažycie nam sponsarskuju dapamohu. Ja skazaŭ: davajcie rachunak, kab usio było aficyjna. Chabar davać nie chaču. A jany admovilisia», — uzhadvaje jon.
Prybudovu tak i nie zarehistravali. Tady Vaskabovič pajšoŭ pa sudach. Ale ničoha tak i nie dabiŭsia.
«Byli try ŭkazy Łukašenki pra toje, kab samavolnyja budynki ŭnosili ŭ śpis dazvolenych. Usich maich susiedziaŭ unieśli. A mianie — nie».
U tym domie žyli 9 čałaviek: sam Alaksiej Michajłavič z žonkaj i jaho žanatyja syny ź dziećmi.
U 2006 hodzie Vaskabovičam paviedamili, što ich buduć vysialać: budujecca novaja stancyja mietro «Michałova». I prapanavali pierajechać u čatyrochpakajoŭku. Vaskabovičy admovilisia.
«Pa-pieršaje, my chacieli ci pryvatny dom, navat mienšaha pamieru, ci ŭčastak i hrašovuju kampiensacyju, — tłumačyć Alaksiej Michajłavič. — Da taho ž, naš dom uvohule mietro nie pieraškadžaŭ: pavodle dakumientaŭ, jaho źniščali dla budaŭnictva časovaha pitnoha vodapravoda!»
Potym Vaskabovičam prapanavali dźvie kvatery: dvuch- i trochpakajoŭku. Ale mietraŭ na ŭsich usio roŭna nie chapała. Da taho ž, śćviardžaje Alaksiej Michajłavič, kampiensavać straty za pavyšanuju kamfortnaść doma, haspadarčyja pabudovy nichto nie źbiraŭsia.
Iznoŭ sudy. Vaskabovič zmahajecca za svajo.
A ŭ 2009 hodzie, kali sud Maskoŭskaha rajona prymaje rašeńnie ab spynieńni pravoŭ ułasnaści na asabniak i vyrašaje prymusova pryznać prava ŭłasnaści Vaskabovičaŭ na sacžyllo, Alaksiej Michajłavič prydumvaje novuju stratehiju baraćby. Jon abviešvaje svoj dom płakatami z zaklikami da Łukašenki i cytatami z Kanstytucyi. Publikacyi pra jaho adrazu źjaŭlajucca u bolšaści ŚMI, a internaŭty zapisvajuć jaho ŭ lik hałoŭnych zmaharoŭ z haradskimi ŭładami.
U 2012 hodzie narešcie adkryvajuć stancyju «Michałova». Dom Vaskabovičaŭ usio jašče staić. Nasamreč, nijakamu budaŭnictvu jon i nie pieraškadžaŭ. Ale siamja ŭsio adno pavinna źjechać: na miescy ich katedža płanujecca budaŭnictva šmatkvaternaha žyłoha kompleksu.
U vyniku sudy Vaskabovič vyjhraŭ. Jamu dali try kvatery na try siamji: adnu čatyrochpakajoŭku i dźvie dvuški. Dom na Umanskaj usio ž źnieśli ŭ 2014 hodzie. Adnak pretenzii da ŭłady ŭ Alaksieja Michajłaviča zastalisia. I šmat.
«Hrašovaj kampiensacyi ziamielnych nasadžeńniaŭ i sielskahaspadarčych pabudovaŭ ja tak i nie ŭbačyŭ. Kali pryjechali rujnavać dom, ja skazaŭ, kab skłali akt na majomaść, jakuju źniščajuć. Mnie admovili i pryhrazili milicyjaj. Ja skazaŭ: vyklikajcie! — raspaviadaje Vaskabovič. — Milicyjanty pryjechali, ja patłumačyŭ im, što adbyvajecca. Jany pavieźli mianie ŭ adździaleńnie, nibyta pisać zajavu. A nasamreč zakinuli ŭ «abiaźjańnik» i pratrymali tam da ranku. Za hety čas dom złamali».
Pry hetym nie tolki Vaskabovič niezadavoleny tym, jak pavodzili siabie ŭłady. Adna ź jaho susiedak prasiła za svoj dom, płoščaj 76 m2, dvuchpakajovuju kvateru. Jaje ŭhavaryli vyjechać u adnušku i paabiacali hrašovuju kampiensacyju. Tych hrošaj jana čakaje i pa siońniašni dzień.
Svaju kampiensacyju Vaskabovič ćviorda vyrašyŭ atrymać. Jon upeŭnieny, što staŭ achviaraj toj samaj karupcyi, ź jakoj zaraz viadziecca pakazalnaja baraćba.
Jon usio adno spadziajecca na spraviadlivaść i piša va ŭsie viedamstvy — ad KDB da Śledčaha kamiteta. A svaje listy padpisvaje tak: «Abkradzieny čynušami A.Vaskabovič».
