Kadr z multfilma «Mułan»
Natchnionaja pośpiecham novaj «Papiałuški», studyja Disney voźmiecca za kinaadaptacyju multfilma «Mułan», paviedamlaje The Hollywood Reporter.
Na siońnia viadoma tolki toje, što pradziusarami novaj «Mułan» stanuć Krys Biender i Dž. S. Śpink, jakija pracavali nad «Chłapiečnikam u Viehasie» i «My — Milery», a scenarystami — Łoren Chajnek i Elizabet Marcin.
Daty pačatku zdymak i vychadu na ekrany nieviadomyja.
***
Aryhinalny multfilm «Mułan» 1998 hoda raspaviadaŭ historyju advažnaj Fa Mułan (albo Chua Mułań), jakaja pieraapranułasia ŭ mužčynu, kab baranić Radzimu ad našeścia hunaŭ. Z dapamohaj maleńkaha drakona Mušu i cvyrkuna Kry-Ki jana pieramahaje lidara hunaŭ Šań-Ju i stanovicca adnoj z samych niezvyčajnych «dysnejeŭskich prynces».
Multfilm atrymaŭ pazityŭnyja vodhuki krytykaŭ i pry biudžecie ŭ 70 młn dalaraŭ sabraŭ u suśvietnym prakacie 300 młn dalaraŭ. Druhaja častka multfilma vyjšła naŭprost na DVD i nie mieła šyrokaha pośpiechu.
Isnujuć prynamsi šeść kitajskich kinaadaptacyj lehiendy pra Mułan (najbolš viadomaja — stužka 2009 hoda režysiora Ma Čušen), ale nivodnaja nie mieła pośpiechu na Zachadzie.
Płany Disney pa pierazapuskach svajoj spadčyny nie abmiažoŭvajucca «Mułan». Studyja rychtuje pierazapuski «Krasuni i pačvary», «Damba» (im zojmiecca Cim Biortan), «Knihi džunhlaŭ» i «Bembi».
U intrenecie nabiraje papularnaść žartaŭlivy trejler pa matyvach pierazapuskaŭ dysnejeŭskaj kłasiki, dzie rolu alaniatki Bembi vykonvaje Duejn Džonsan.
