Ałataŭski rajonny sud Ałmaty asudziŭ Taćcianu Šaŭcovu-Vałovu da čatyroch hadoŭ pazbaŭleńnia voli ŭmoŭna z vyprabavalnym terminam u try hady za «raspalvańnie mižnacyjanalnaj varožaści». Pryčynaj stali jaje pasty ŭ fejsbuku ab mahčymym paŭtory krymskaha scenara ŭ Kazachstanie. Pra heta paviedamlajuć kazachskija ŚMI.
Zhodna z rašeńniem suda, Šaŭcova-Vałova nie zmoža pakidać Kazachstan, źmianiać miesca žycharstva i pracy biez apaviaščeńnia śpiecyjalnaha dziaržaŭnaha orhana.
Abvinavačanaja z samaha pačatku admaŭlała svaju vinu. Jana nie pahadziłasia z prysudam i budzie padavać apielacyju.
«Sprava była sfabrykavanaja, skrynšoty byli padroblenyja», — śćviardžaje Šaŭcova-Vałova.
Sprava pačałasia viasnoj 2014 hoda z zajavy adzinaccaci žycharoŭ Ałmaty ŭ Departamient unutranych spravaŭ z prośbaj pryciahnuć abvinavačvanuju da adkaznaści za raspalvańnie mižnacyjanalnaj varožaści ŭ sacyjalnych sietkach.
Abvinavačanaja apublikavała ŭ sacyjalnych sietkach niekalki pastoŭ, u jakich abražała hramadzian Kazachstana pa nacyjanalnaj prykmiecie.
«Kali budziecie ładzić tut u KZ taki ž (…) z nahody movy i ŭźvialičvańnia svajoj karennaj nacyi, to z vami budzie toje ž samaje, što i z Krymam — paŭnočnyja, a, mahčyma, što i ŭsie astatnija častki KZ piarojduć u RF. I nie šlacham aneksii, jak vy tut viskočacie na kožnym rahu, a šlacham refierendumu, jak heta adbyłosia ŭ Krymie, h.zn. dobraachvotnym uvachodžańniem u skład RF», — napisała Šaŭcova-Vałova ŭ svaim fejsbuku.