Lidar ruchu «Za Svabodu» Alaksandr Milinkievič ličyć nieabchodnym pravieści paŭtorny konkurs na pasadu rektara Jeŭrapiejskaha humanitarnaha ŭniviersiteta (Vilnia).
Pra heta jon zajaviŭ BiełaPAN, kamientujučy infarmacyju pra abrańnie novym rektaram EHU prafiesara Devida Polika, jaki časova vykonvaje abaviazki rektara. Jaho kandydaturu 3 krasavika ŭchvaliŭ ahulny schod zasnavalnikaŭ.
Praces vybaraŭ rektara nie vyklikaŭ davieru ŭ studentaŭ, vypusknikoŭ, hramadzianskaj supolnaści Biełarusi, adznačyŭ Milinkievič. Na jaho dumku, paŭtorny konkurs možna pravieści chutka, važna, kab jon byŭ adkrytym.
«Dla taho kab prasoŭvać nieabchodnyja ŭ EHU reformy, čałaviek, jaki stanie rektaram univiersiteta, pavinien być lehitymny i mieć padtrymku studentaŭ, akademičnaj i hramadzianskaj supolnaści», — skazaŭ Milinkievič.
Razam z tym, zaznačyŭ jon, univiersitet «ciarpić u vyniku konkursu, jaki zaciahnuŭsia». Tut ciažka vykładać, vučycca, nie vyklučany składanaści z naboram studentaŭ, bo ludzi sumniavajucca va ŭstojlivaści budučyni EHU.
«Los univiersiteta nievierahodna važny dla Biełarusi, — skazaŭ Milinkievič. — Ciapier jość vialikaja aściaroha, ci nie stanie EHU drejfavać u bok ruskaha śvietu. Vialikaja niebiaśpieka zaklučajecca ŭ tym, što heta budzie amierykanska-rasijski ŭniviersitet. Nie dumaju, što ŭ vypadku, kali EHU ŭznačalić prafiesar Devid Polik, univiersitet zachavaje biełaruskaść. U maim razumieńni heta nie hetulki moŭnaja palityka, ale słužeńnie Biełarusi, praca na jaje karyść šlacham praviadzieńnia daśledavańniaŭ pa temie Biełarusi i padrychtoŭka dla krainy elity. Biełarusi nieabchodnyja reformy — pry hetaj uładzie ci bieź jaje. Moładź pavinna pravieści hetyja reformy, starejšaje pakaleńnie naŭrad ci spravicca», — skazaŭ Milinkievič.
