Zvyčajna dla takich śpisaŭ šukajuć plusy. «Naša Niva» skłała ŭmoŭny śpis taho, što moža być minusam naradžeńnia ŭ Biełarusi. Nie ŭsprymajcie surjozna, prosta pažytak dla dumak, cikavyja i niepryjemnyja fakty. A my čakajem kamientaroŭ-kontrarhumientaŭ, jakija dapamohuć skłaści «100 plusaŭ ad naradžeńnia ŭ Biełarusi»
Akcent i mova
Pry naradžeńni ŭ Biełarusi vašy šancy na dobraje vałodańnie zamiežnaj movaj istotna źmienšacca. Uzrovień vykładańnia anhlijskaj ci niamieckaj u škole nizki. Zhodna ź Biełstatam, svabodna havoryć pa-anhlijsku tolki kožny dvaccaty biełarus, pa-niamiecku kožny soty. I toje, jość pryčyny sumniavacca ŭ hetych ličbach. Da taho ž, navat naša «rasijskaja» mova dastaniecca vam z charakternym vymaŭleńniem.
Vizy i miežy
Jak uładalnik biełaruskaha pašpartu vy možacie raźličvać na biaźvizavy ŭjezd usiaho ŭ 21 krainu śvietu. Ukrainski pašpart daŭ by vam mahčymaść biez kłopataŭ naviedać 34 krainy. Pryčym paŭdniovyja susiedzi jak nikoli blizkija da biaźvizavaha režymu ź ES. A ź finskim pašpartam možna śmieła jechać u 170 krain śvietu.
Da taho ž, siarod usich našych susiedziaŭ, my majem najhoršy vizavy režym ź Jeŭropaj — rasijanie i ukraincy płaciać za «šenhien» 35 jeŭra, a nie 60.
Aeraporty i transpart
Aproč vizaŭ, biełarus sutykniecca jašče z prablemaj transpartu — najaŭnaść miežaŭ ź ES adymaje čas. Na niekalki hadzin zaciahniecca i padarožža na ciahniku ŭ susiedniuju Polšču — šyrynia našaj kalejki nie adpaviadaje jeŭrapiejskaj, ciahnik vymušany źmianiać koły.
Aeraport, ź jakoha rehularna lotajuć rejsy ŭ inšyja krainy, adzin, u Minsku. Kaniešnie, jość adzin rejs Homiel-Kalininhrad i mnostva letnich čartaraŭ u Turcyju z Bresta, ale Minsk-2 — asnoŭny i adziny pasažyrski aeraport krainy. Ź jakoha, na žal, nie latajuć tannyja avijalinii.
Mapa krain, dzie niama łaŭkost-pieravozčykaŭ
Hory, mora i nadvorje
Mapa, jakaja vyšej, moža być vykarystana dla ilustracyi nie tolki prablem u transpartnaj śfiery. Naprykład, my adzinaja kraina, jakaja nie ŭvachodzić u Radu Jeŭropy ci Bałonski praces, a taksama kraina, jakaja nie maje ani dostupu da mora, ani ŭłasnych hor.
Vy dumajecie, heta kaniec? Pahladzicie ŭ akno, vierahodna, nieba budzie šeraha koleru. Heta nie dziŭna, bo daždžoŭ u Minsku bolš, čym u Łondanie, a soniečnych dzion u nas mienš, čym u Kalifornii ŭ cełych piać razoŭ.
Biełaruski rubiel
Jak žycharam Biełarusi, nam dastaŭsia biełaruski rubiel, adna z samych niestabilnych i słabych valut śvietu. Tolki za apošnija piać hod jon devalvavany na 533%.
Naohuł, kali kazać pra ekanamičnyja pytańni, mnohija biełarusy nie zmohuć pačuvacca ščaślivymi. Niadaŭna vyśvietliłasia, što piensija ŭ susieda-palaka ŭ siarednim bolšaja, čym zarobak u biełarusa.
Košty i mahčymaść vybaru
Nie sakret, što najlepšy biełaruski šopinh adbyvajecca za miežami krainy. Biełarusy jeździać u Vilniu ci Varšavu nie tolki z-za taho, što ŭ nas niama suśvietnych brendaŭ, ale i tamu, što tam tańniej. Biełaruś abminajuć nie tolki avijapieravozčyki, ale i vytvorcy vopratki, sietki kaviarniaŭ i fastfudaŭ.
Adsutnaść ščaścia
Vyznačyć, što robić biełarusa nieščaślivym, dakładna nielha, ale vyznačyć, nakolki, sprabuje Mižnarodny indeks ščaścia. Rejtynh adnosić Biełaruś da 165 miesca ŭ śviecie.
Praciahvać raźbirać rejtynhi, u jakich my nie ŭvachodzim u pieršuju sotniu krain, možna davoli doŭha. Z važnaha nazaviom toje, što Biełaruś u pieršaj dvaccatcy pa kolkaści samahubstvaŭ i 119-ja ŭ śviecie pa čakanaj praciahłaści žyćcia. Nas abyjšła i Ukraina, i Litva, i Hruzija. Choć u SSSR biełarusy žyli bolš za ŭsich inšych susiedziaŭ.
Niaźmiennaja ŭłada
Palityk Pavieł Sieviaryniec u tekście viktaryny «Šou Biełaruščyny» tak farmulavaŭ niehatyŭnuju viadomaść Biełarusi ŭ śviecie «Łukašenka, Niamiha, Čarnobyl». I kali pra trahiedyju ŭ pierachodzie «Niamihi» pačali zabyvać navat u nas, to niaźmienny Łukašenka i radyjacyja pa-raniejšamu aktualnyja. Pryčym paniaćci tojesnyja — biełarusy pačali stavicca da niaźmiennaj ułady jak da radyjacyi: zmahacca niemahčyma, treba čakać albo jechać padalej.
Nieviadomaja kraina
Vizy, transpart, adsutnaść mora aktualnyja pa dva baki miažy. My, napeŭna, uvachodzim u piaciorku samych nieviadomych krain na kantyniencie — turystaŭ u Biełarusi vielmi mała.
Ale bolšaja prablema jašče i ŭ tym, što biełarusy sami nie asabliva viedajuć pra svaju krainu i jašče mienš vierać u jaje pośpiech. Internacyjanalistyčnaja ideałohija, rasijskaja mova i kultura, savieckaja historyja i rasijskaje TB vybili hlebu ŭ samich biełarusaŭ: «zrazumieć, chto my jość» — vialikaje vyzvańnie dla nacyi.
