Kłasičny ci čorny Čałaviek-pavuk? Kłasičny. Ale ništo nie zaminaje jamu być čornym
Padčas pres-turu ŭ padtrymku filma «Mściŭcy: Era Altrona» pradziusar Kievin Fajhi raspavioŭ niekatoryja detali pra budučy film u suśviecie «Čałavieka-pavuka», pieradaje ScreenCrush.
Čarhovy pierazapusk «Čałavieka-pavuka» znoŭ raspaviadzie historyju Pitera Parkiera. Fanaty ža spadziavalisia na ekranizacyju historyi Majłza Maralesa — čarnaskuraha chłopca, jaki apranuŭ kaścium pavuka paśla śmierci Parkiera.
U novym filmie pakažuć Pitera Parkiera ŭ jaho školnyja hady, va ŭzroście 15-16 hod. «Choć i było ŭžo piać filmaŭ, jość jašče mnoha rečaŭ, jakija nie pakazanyja. Heta nie tolki hieroi i złodziei, ale i rysy jaho (Čałavieka-pavuka — NN) charaktaru», — skazaŭ Fajhi.
Naŭrad ci akciory z papiarednich filmaŭ pra Čałavieka-pavuka padyduć na rolu junaha Parkiera: Endru Harfiłdu ŭžo 31 hod, Tobi Mahvajeru — 39. Ale kančatkovaje vyrašeńnie pra akciora na hałoŭnuju rolu nie pryniataje. Nie vyklučana, što i Piter Parkier moža stać čarnaskurym.
Jak udakładniŭ Farhi partału Crave Online, u pierazapusku nie stanuć znoŭ raspaviadać historyju pachodžańnia Čałavieka-pavuka, užo pakazanuju na ekranach niekalki raz. Pa vulicach Ńju-Jorka ŭžo budzie biehać chłopiec u pratatypie kaściuma Pavuka — što było da taho, hledačy i tak viedajuć, kaža jon.
Kaścium Čałavieka-pavuka ŭžo hatovy. Pradziusar abiacaje, što jon budzie kłasičnym, ale niepadobnym da papiarednich. Upieršyniu «pierazapuščany» Čałaviek-pavuk źjavicca ŭ filmie «Pieršy mściviec: Hramadzianskaja vajna» (jaho zdymki startujuć 27 krasavika), a zatym atrymaje ŭłasny film.
