Čarhovy Fest ekskursavodaŭ projdzie ŭ Biełarusi 18-19 krasavika.
Kali pahladzieć śpis ekskursij pa Minsku — vočy raźbiahucca. Śpis ekskursij pa inšych haradach taksama maje bahata cikavaha.
Arhanizatary abiacajuć sakralnyja, rovarnyja, dziciačyja ekskursii i navat ekskursii-śpiektakli i ekskursii-kvesty — lubyja, jakija tolki možna ŭjavić.
Na jakija ekskursii schadzić? Ciažkoje pytańnie. Niecikavych ekskursij nie pradbačycca. Ale možna vyłučyć niekatoryja nietypovyja.
Śpiašajciesia, na kvest u Trajeckim pradmieści, ekskursiju pa mietrapalitenie i tramvajnyja ekskursii zapis užo zavieršany — chutka mohuć razabrać i inšyja!
Minskija młyny: pa śladach lehiendarnaha Mienieska
U navučalnaj ekskursii Jaŭhiena Kazancava 18 krasavika z 14:00 možna daviedacca pra lehiendarnaha vołata Mienieska dy žyćcio pramysłovaha Minska ŭ XIX stahodździ.
Na złomie epoch: Minsk u 1905—1919 hh.
Pačatak XX st. — niespakojny, ale zachaplalny čas, pra jaki zvyčajny minčuk viedaje nie tak i mnoha. Vypravić heta pastarajecca Andruś Unučak 19 krasavika a 16-j hadzinie.
Archieałahičnyja pomniki Minska: Sucharaŭskija kurhany
18 krasavika z 16-j hadziny archieołah Aleś Vašanaŭ pakaža archieałahičnyja pomniki, jakija my bačym, ale nie zaŭvažajem, dy raspaviadzie, adkul jany ŭzialisia i navošta rabilisia.
Stračanyja śviatyni
Dzie znachodziŭsia pieršy kamienny chram, samaja staraja sinahoha dy minskaja miačeć, raspaviaduć 19 krasavika a 14-j hadzinie Pavieł Ivanicki i Hanna Maroz.
Ekałahičnaja kvest-ekskursija
Pa zialonych u pramym i pieranosnym sensie miaścinach raspaviadzie a 10-j ranicy 19 krasavika Dźmitryj Vaśkovič ŭ Centra ekałahičnych rašeńniaŭ. Sumna nie budzie, ekskursiju praviaduć u formie kvestu.
Strytvokier: halereja «redzi-mejd» abjektaŭ
Tvorčaja hrupa «Strytvorkier» abiacaje ŭ 18:00 18 sakavika pačać nie prosta ekskursiju, a ekskursiju-śpiektakl pa Vierchnim horadzie. Dobraja mahčymaść inakš pahladzieć na znajomyja miaściny.
Lehiendy i mify minskich niefarmałaŭ apošniaj čverci XX stahodździa
Adna z rovarnych ekskursij pa Minsku skłałasia ŭ siurrealistyčny maršrut art-supołki «Biełaruski klimat». Niezvyčajnyja nie tolki hieroi ekskursii, ale i čas pačatku — 18 sakavika ŭ 19:57.
U pošukach sakury
Samaja niečakanaja dla Minska ekskursija pačniecca 19 krasavika a 10-j ranicy. U čas vučebnaj ekskursii Nastaśsi Piarhajevaj buduć šukać kavałački japonskaj kultury ŭ biełaruskaj stalicy dy słuchać pra Minsk vačyma japonca.
Studzionka, Biarezina, Zaniŭki, Zembinskija haci ŭ 1812 h.
Vialikaja zaharadnaja ekskursija projdzie ŭ Barysaŭskim rajonie 19 sakavika z 12:00. Mikałaj Čarnucha raspaviadzie nie tolki pa padziei na Bryloŭskim poli padčas vajny z Napaleonam, ale i dapoŭnić apovied animacyjaj i viktarynaj.
Płošča Niezaležnaści navobmacak
Admysłovuju ekskursiju padrychtavali i dla ludziej z parušeńniami zroku. Ludmiła Skradal prezientuje jaje 19 krasavika a 12-j hadzinie. Jana prademanstruje aŭtarskuju mietodyku ekskursij, što ŭklučaje nie tolki apovied, ale i taktylnyja vyjavy dy makiety.
***
Heta daloka nie ŭsie niezvyčajnyja ekskursii Festu. Poŭny śpis ekskursij pa ŭsioj Biełarusi hladzicie na sajcie fest-guides.by.
