Nacyzm i stalinizm nielha pryraŭnoŭvać adzin da adnaho, zajaviŭ rasijski prezident Uładzimir Pucin padčas pramoj linii ŭ čaćvier. Raniej va ŭraŭnoŭvańni hetych paniaćciaŭ rasijski MZS abvinavačvaŭ kijeŭskija ŭłady, jakija pryniali zakony ab «dekamunizacyi Ukrainy».
«Nacysty prama, adkryta i publična abviaścili adnoj z metaŭ svajoj palityki źniščeńnie cełych etnasaŭ — jaŭrejaŭ, cyhan, słavian. Pry ŭsioj pačvarnaści stalinskaha režymu, pry ŭsich represijach, navat pry ŭsich vysyłkach cełych narodaŭ usio ž taki mety źniščeńnia nikoli stalinski režym dla siabie nie staviŭ», — rastłumačyŭ kiraŭnik dziaržavy, adkazvajučy na pytańnie pra skažeńnie historyi.
Pavodle jaho słoŭ, sproba pastavić «na adnu došku adnych i druhich» nie maje pad saboj hleby.
Historyk Andrej Zubaŭ adznačaje, što kamunistyčny režym, u tym liku i stalinski, biezumoŭna, nie zajaŭlaŭ pra namier źniščać narody, adnak staviŭ metaj pazbaŭleńnie hramadstva ad cełych sacyjalnych kłasaŭ i hrup.
«I pry Leninie, i pry Stalinie taksama havaryłasia ab źniščeńni ekspłuatatarskich kłasaŭ. Pryčym źniščeńni — nie zžyvańni, a mienavita fizičnym źniščeńni… miljony ludziej byli zabityja padčas leninska-stalinskaha režymu tolki za toje, što jany naležali da pamieščykaŭ, kapitalistaŭ, intelihientaŭ, aficeraŭ, śviataroŭ, rabinaŭ, prosta kulturnych ludziej, kupcoŭ, biznesmienaŭ i hetak dalej», — ličyć historyk.
Pavodle jaho słoŭ, u časy Čyrvonaha i Vialikaha teroru ludziej represavali tolki z-za taho, što jany ci ich baćki naležali da vyšejšych płastoŭ darevalucyjnaj Rasii abo inšych dziaržaŭ.
Zajava Uładzimira Pucina niepravamiernaja, ličyć Zubaŭ.
«Spalić čałavieka i ŭtapić jaho — heta roznyja rečy, ale heta adnolkava žudasna. Voś toje ž samaje možna skazać pra Hitlera i Stalina», — kaža historyk.
Rasijskija ŭłady nie raz vinavacili Zachad u sprobie «pierapisać historyju», u pryvatnaści zajaŭlajučy, što pieramienšvańnie ŭkładu SSSR u pieramohu ŭ Druhoj suśvietnaj vajnie faktyčna aznačaje apraŭdańnie nacyzmu.
12 krasavik Papa Francysk nazvaŭ złačynstvy stalinizmu adnoj z samych vialikich trahiedyj XX stahodździa, u adnym šerahu z złačynstvami nacyzmu i hienacydam armian.
