Fiederalnaja słužba pa vieterynarnym i fitasanitarnym nahladzie RF (Raśsielhasnahlad) vyjaviła uzbudžalnikaŭ vostraj kišačnaj infiekcyi čałavieka i žyvioł - salmanieł ŭ astudžanym miasie ptuški, pastaŭlenym ź Biełarusi. Pra heta havorycca ŭ paviedamleńni słužby, jako cytuje ahienctva TASS.
«Praviedzienyja refierentnym centram Raśsielhasnahladu daśledavańni pakazali, što ŭ partyi astudžanaha miasa ptuški, pastaŭlenaj ź Biełarusi, vyjaŭlenyja salmanieły S.Enteritidis. Niebiaśpiečnaja dla zdaroŭja pradukcyja pastupiła z pradpryjemstva TAA Ahrakambinat «Dziaržynski», - havorycca ŭ relizie.
Raśsielhasnahlad ŭ ciapierašni čas prymaje miery da vyklučeńnia niebiaśpiečnaj partyi z volnaha abarotu na terytoryi Rasii.
Pavodle dadzienych viedamstva, heta ŭžo piaty vypadak vyjaŭleńnia salmanieły ŭ miasie ptuški ź Biełarusi ŭ 2015 hodzie, u pryvatnaści z pradpryjemstvaŭ AAT «Homielskaja ptuškafabryka», IP Saryja Bija-Indastrys, AAT Ptuškafabryka «Družba» i TAA Ahrakambinat «Dziaržynski».
U svoj čas Raśsielhasnahlad brakavaŭ biełaruskuju małočku, małdaŭskija viny, ukrainskija cukierki i hruzinskuju baržomi. Heta supadała z paharšeńniem staŭleńnia Kramla da hetych krain. Prapucinskija ŚMI na minułym tydni krytykavali Alaksandra Łukašenku za rašeńnie nie jechać u Maskvu na parad 9 Maja. U Maskvie nie budzie taksama kiraŭnikoŭ krain Jeŭrasajuza, ZŠA dy inšych dziaržaŭ kolišniaj antyhitlerskaj kaalicyi. Heta reakcyja na rasijskuju ahresiju va Ukrainie.