Ihar Skrypka zastaŭsia ŭ zachapleńni ad Karpat.
Premjera ŭkrainskaha telesieryjału «Apošni maskal» adbyłasia 14 krasavika. Nad im pracuje «1+1 Pradakšn».
Sieryjał raspaviadaje pra maskoŭskaha chłopca Valeru, jakoha los zmusiŭ znajści svajakoŭ siarod karpackich hucułaŭ. Valera sustrenie i stereatypnaje staŭleńnie da «maskaloŭ», i sapraŭdnaje kachańnie.
«Apošni maskal» pakazvajecca nie tolki pa TV, ale i vykładvajecca ŭ volny dostup na Youtube:
Rolu «maskala» Valery ŭ sieryjale vykonvaje rasijski akcior Ihar Skrypka. «Naša Niva» raspytała akciora pra sieryjał i jaho staŭleńnie da słova «maskal».
— Vy naradzilisia ŭ Syzrani, vučylisia ŭ Maskvie, vykonvali roli ŭ rasijskich sieryjałach. Jak vas zaniesła ŭ Karpaty?
— U Karpaty ja pryjechaŭ na ciahniku z Kijeva ŭ Ivana-Frankoŭsk razam sa zdymačnaj hrupaj. Byŭ tam usiaho try dni i ŭsie dni pracavaŭ. Voś tak mianie i zaniesła ŭ Karpaty (śmiajecca).
— Ci kryŭdziciesia vy na słova «maskal»?
— Nie, nie kryŭdžusia. Ja spakojna staŭlusia da takoha kštałtu moŭnych vyrazaŭ-etnonimaŭ. Žyćcio — takaja cikavaja i dziŭnaja štuka, što hłupstva marnavać jaho na kryŭdy i ŭsialakija duraści.
— Vy viedajecie ŭkrainskuju movu? Vučyli jaje admysłova ci i tak razumiejecie?
— Da zdymak viedaŭ tolki niekalki piesień pa-ŭkrainsku, što vykonvaŭ jašče ŭ navučalnym teatry HITISa. Movu vučyŭ padčas zdymačnaha pracesu, partniory ŭ kadry havorać pa-ŭkrainsku! I ja staŭ praź niejki čas razumieć i navat razmaŭlać pa-ŭkrainsku.
— Vy znajomilisia z sapraŭdnymi hucułami, ich tradycyjami? Jak uražańni ad ukrainskich Karpataŭ?
— Žycharoŭ Karpataŭ bačyŭ tolki padčas zdymak, śpiecyjalna nie znajomiŭsia, nie było kali. Ad Karpataŭ vydatnyja ŭražańni. Čystaje pavietra, pryhožaja pryroda, cudoŭnyja piejzažy, smačnaja ježa.
— Kali nie sakret, u vašaha hieroja Valery ŭ amurnych sensie ŭsio kali-niebudź składziecca ŭdała ci čakać pastajannaj dramy?
— Nie chaciełasia b raskryvać intryhu! Historyja u Valery bolš čym cikavaja — i luboŭnaja, i sacyjalnaja. Z kožnaj sieryjaj padziei buduć raźvivacca i ŭskładniacca, u lubym razie, usio ŭ jaho rukach. Dramatyčnyja momanty taksama buduć!
— Chacieli b apynucca na miescy svajho hieroja?
— Ja zaŭsiody padzialaju hieroja i siabie, namahajusia lubić svajho hieroja, pryniać i zrazumieć usie jaho baki. Być moža, mnie było b cikava apynucca na jaho miescy, ale ja nie ŭpeŭnieny, što ŭ mianie składziecca ŭsio tak ža, jak u jaho. Valera — heta Valera, a ja — heta ja.
— Paśla hetaha sieryjała viernieciesia ŭ rasijskaje kino ci praciahniecie zdymacca va Ukrainie?
— Ja nikudy i nie sychodziŭ, kab viartacca. I da, i padčas, i paśla zdymak u hetym sieryjale, što prachodzili vosieńniu minułaha hoda, u mianie była praca i ŭ kino, i ŭ teatry, i zaraz jość. Ja zaŭsiody adkryty da prapanoŭ, niezaležna ad miesca zdymak. Hałoŭnaje — dobry scenar.