Žanr: fantastyka, bajavik, pryhody
Režysior: Džos Uidan
U rolach: Robiert Daŭni-małodšy, Krys Chiemsvart, Krys Evans, Skarlet Jochansan, Mark Rufała, Džeremi Renier, Aaran Tejłar-Džonsan, Elizabiet Ołsien, Džejms Śpiejder, Semiueł Ł. Džeksan
ZŠA, 141 chv.
Adznaka: 8
Kamanda Mściŭcaŭ — niezaležnaja arhanizacyja, jakaja abaraniaje čałaviectva, — padčas palavańnia na złamyśnikaŭ z «Hidry» znachodzić štučny intelekt, zamuravany ŭ kamień. Kab «ažyvić» jaho i skarystać u prajekcie «Altron», stvoranym dla abarony Ziamli ad lubych pahroz, vynachodnik Toni Stark i navukoviec Benier (Chałk) z dapamohaj robata Džarvisa zapuskajuć eśpierymient.
Tak naradžajecca Altron — mahutny štučny intelekt. Niečakana jon vyrašaje, što hałoŭnaj pahrozaj dla Ziamli źjaŭlajecca samo čałaviectva. Tolki abjadnaŭšysia i padklučyŭšy ŭsie mahčymyja siły, Mściŭcy zmohuć raspačać bitvu z Altronam, kab vyratavać ludziej ad źniščeńnia.
Adzinaccaty film kiniematahrafičnaha suśvietu Marvel zasnavany na adnajmiennych komiksach i źjaŭlajecca sikviełam «Mściŭcaŭ» (2012).
Da ŭžo viadomaj kamandy (Žalezny čałaviek (sapraŭdnaje imia — Toni Stark), Kapitan Amieryka (Styŭ Rodžars), Chałk (Brus Benier), Sakalinaje voka (Klint Bartan), Čornaja ŭdava (Nataša Romanaf)) na čale ź Nikam Fjury dałučajucca mutanty Pjetra (Rtuć) i Vanda (Čyrvonaja viadźmarka) Maksimaf. Ich roli vykanali Elizabiet Ołsien i Aaran Tejłar-Džonsan, jakija dla padrychtoŭki pračytali ŭsie numary komiksa «Marvel Ultimates», dzie fihuravali ich piersanažy. Siužet stužki adychodzić ad padziej, prapanavanych u komiksie «Era Altrona» 2013-ha hoda: tam Altron byŭ stvareńniem doktara Pima (Čałaviek-muraška). U filmie jon stvorany vynachodnikam Toni Starkam.
Rolu hałoŭnaha złodzieja Altrona vykanaŭ Džejms Śpiejder, jaki byŭ abrany z-za jaho «hipnatyčnaha hołasu, jaki moža być strašna spakojnym i pierakanaŭčym i ŭ toj ža čas prostym i śmiešnym», pa vyznačeńni režysiora Džosa Uidana.
Zdymki filma adbyvalisia ŭ Paŭdniovaj Afrycy, Vialikabrytanii, Italii i Paŭdniovaj Karei. Na zdymkach epizodaŭ u Sieule byli skarystanyja ŭnikalnyja drony i mašyny na dystancyjnym kiravańni,
jakija dazvolili zdymać sceny ź nievierahodnych rakursaŭ, nie dastupnych ni apierataram, ni viertalotam. Pradziusary zaprasili karejskich śpiecyjalistaŭ pa piłatavańni dronaŭ i dystancyjnych aŭtahonkach Paka Min Kie i Mientru Pa.
Zachaplalny siužet, vidoviščnaść i humar zaŭždy adroźnivali filmy studyi Marvel, i novyja «Mściŭcy» nie vyklučeńnie. Stužka spadabajecca amataram ekšnu i fantastyki.
