U Mahilovie 4 maja adbyłosia ŭračystaje adkryćcio novaha pryčała na Dniapry.
Jak było adznačana na cyrymonii adkryćcia, u Mahilovie raniej, u pačatku minułaha stahodździa, była prystań na Dniapry.
«Novy pryčał — heta adzinaje inžyniernaje zbudavańnie takoha ŭzroŭniu ŭ akvatoryi Dniapra ad Škłova da Bychava. Da jaho stvareńnia prykłali svaje namahańni i prafiesijanalizm rabotniki našych kamunalnych pradpryjemstvaŭ», — zajaviŭ staršynia Mahiloŭskaha harvykankama Uładzimir Cumaraŭ. Jon adznačyŭ, što źjaŭleńnie novaha pryčała ŭ horadzie daść dadatkovy stymuł dla raźvićcia turyzmu. «I ŭ pierśpiektyvie ŭ Mahilova buduć usie šansy zaniać hanarovaje miesca siarod vodnych turystyčnych maršrutaŭ Biełarusi»,— skazaŭ čynoŭnik.
Pryčał raźličany na try katary. Ad jaho mahilaŭčanie i hości horada zmohuć rabić vodnyja ekskursii pa Dniapry, lubavacca miascovymi piejzažami i haradskoj zabudovaj.
Da adkryćcia novaj prystani, budaŭnictva jakoj pačałosia letaś, Mahiloŭski haradski saviet deputataŭ daŭ nazvu nabiarežnaj. Ad haścinicy «Turyst» da naziralnaj placoŭki jana ciapier maje imia Voinaŭ-internacyjanalistaŭ, a ad naziralnaj placoŭki da mosta cieraz Dniepr pa Puškinskim praśpiekcie zaviecca Trajeckaj nabiarežnaj.
