Za złačynstvy «Dron» prysudžany da 20 hadoŭ pazbaŭleńnia voli z kanfiskacyjaj majomaści. Sudzili abvinavačanaha pavodle artykuła 100 Kryminalnaha kodeksu redakcyi 1960 hoda. Artykuł soty praduhledžvaŭ za takija złačynstvy 20 hadoŭ pazbaŭleńnia voli ci śmiarotnaje pakarańnie.
Sudzili Drona i pa artykułach novaha Kryminalnaha kodeksa, redakcyi 1999 hoda. Heta artykuły 285, 286, 295 KK (udzieł ŭ bandzie, złačynnaj hrupoŭcy, niezakonnyja dziejańni ŭ adnosinach zbroi).
Sud prachodziŭ u zakrytym režymie. Niekatoryja paciarpiełyja — svajaki achviar, nie zmahli prysutničać na pasiadžeńniach, a niekatoryja śviedki — bajalisia i ciapier, tamu ich pakazańni pa mahčymaści ahučvalisia, biez prysutnaści ŭ zali samich śviedkaŭ.
Na vyniasieńni prysudu prysutničaŭ baćka Andreja — ścipły miascovy rabaciaha. Jon usio žyćcio utrymlivaŭ siamju, jak moh, svajoj ciažkaj pracaj — jeździŭ na «šabaški» u Rasiju. Jak syn trapiŭ u bandu — nie viedaje.
«Ja syna nie bačyŭ užo 15 hadoŭ. Pra bandu my daviedalisia tolki tady, kali Andreja abvieścili ŭ vyšuk, da nas stała chadzić milicyja», — kaža baćka.
Pa jaho słovach, ź dziacinstva Andrej ničym asablivym nie vydzialaŭsia, vučyŭsia siarednie, zajmaŭsia boksam, jeździŭ na spabornictvy, skončyŭ škołu, pastupiŭ u kaledž na budaŭnika, rana žaniŭsia, raźvioŭsia, znajšoŭ druhuju spadarožnicu žyćcia. Zaraz jaho synu ad pieršaha šlubu 20 hadoŭ.
Paśla razhromu bandy Marozava Dron źbieh u Rasiju.
Tam asieŭ u Čalabinskaj vobłaści, nievialikim horadzie, rajonnym centry Kartały. Stvaryŭ novuju siamju, naradzilisia dzieci (małodšamu zaraz čatyry hady). Imavierna, prablem z rasijskim pravasudździem nie mieŭ, tamu i trapiŭ u pole zroku palicyi tolki ŭ 2013 hodzie. Byŭ zatrymany i pieradadzieny na Radzimu. Kryminalnaja sprava składałasia z 44 tamoŭ. Sud ciahnuŭsia z vosieni 2014 hoda.
Składanaści sudovaha śledstva byli ŭ tym, što zabojstvy byli ździejśnieny dvaccać hadoŭ tamu. Niekatoryja ludzi i zaraz žachajucca, pačuŭšy nazvu bandy ci proźvišča ich lidera, choć i rasstralanaha ŭžo Siarhieja Marozava.
«Maci jaho, žonka maja, kali daviedałasia pra jaho ŭdzieł u bandzie — vielmi mocna pieražyvała. Doŭha chvareła, i pamierła. U jaho siabar byŭ, Aleh. Dyk taho adrazu, na pačatku «nulavych» pasadzili, piać hadoŭ dali. Toj užo adsiadzieŭ i vyjšaŭ. A voś jon biehaŭ.. Ale kolki viarovačcy nie vicca», - machaje rukoj baćka.
U čas prysudu jon dakorliva kivaje hałavoj, hladzić na syna. Toj źbirajecca abskardzić prysud.
Banda Marozava dziejničała na terytoryi Homielskaj vobłaści ŭ 90-ch – pačatku 2000-ch hadoŭ. U 2006 hodzie Viarchoŭny sud pryznaŭ vinavatymi ŭ roznych ciažkich złačynstvach 27 udzielnikaŭ hrupoŭki.
Jaje lidar — Siarhiej Marozaŭ — byŭ prysudžany da rasctrełu, jak i jašče dva jaho najbolš aktyŭnyja paplečniki. Astatnija ŭdzielnik bandy atrymali ad 6 da 20 hadoŭ pazbaŭleńnia voli.
18 hadoŭ kałonii atrymaŭ były načalnik kryminalnaha vyšuku, jaki «kryšavaŭ» bandu. Jašče adzin milicyjanier atrymaŭ 11 hadoŭ. Pry vyniasieńni prysudu Viarchoŭny sud adznačyŭ, što «praciahłamu isnavańniu bandy spryjali karumpavanaść niekatorych słužbovych asob pravaachoŭnych orhanaŭ vobłaści». Varta adznačyć, što «dach» u bandytaŭ byŭ samaha vysokaha ŭzroŭniu, kali na praciahu 10 hadoŭ ich nie mahli ni złavić, ni pakarać.
Paciarpiełyja źviartalisia ŭ milicyju, prakuraturu – ale efiekt byŭ nulavy ci naadvarot – supraćlehły i žachlivy: ich «zdavali» bandytam na raspravu.
Što tyčycca asabista Drona i zabojstvaŭ, pa jakich jaho pryznali vinavatym. Varta adznačyć, što jon na sudzie nie pryznaŭ svaju vinu ŭ niepasrednym pazbaŭleńni žyćcia ludziej. Choć i nie admaŭlaŭ, što ŭ toj momant znachodziŭsia na miescy złačynstvaŭ.
Tak, u 1994 hodzie ŭ Homieli byli žorstka zabityja čatyry čałavieki. Da noh achviar pryviazali traki (častki husienic), i skinuli cieły ŭ raku Sož. Pierad hetym lidar bandy pakłaŭ voka na pryhožuju dziaŭčynu, jakaja nie mieła nijakaha dačynieńnia da bandy.
Jaje vykrali na vulicy, zavieźli ŭ pryvatny dom. Sadysty žorstka ździekavalisia ź dziaŭčyny, hvałcili jaje, potym zabili i rasčlanili. Pryjaciel dziaŭčyny zdahadvaŭsia — chto moža być vinavaty ŭ zabojstvie, i niejak pra heta vykazaŭsia. Bandyty vyrašyli likvidavać chłopca. Toj ža, pradčuvajučy niebiaśpieku, razam z bratam źjechaŭ u Vilniu.
Praź niejki čas u litoŭskuju stalicu vyjechali «u kamandziroŭku» dva ŭdzielniki bandy. Im udałosia chitraściu zamanić bratoŭ u Homiel.
Na radzimie niaščasnych čakała strašnaje. Ich i jašče dvuch pryjacielaŭ, jakija pryjechali ź imi ź Litvy, čakała śmierć. Bratoŭ zabili i skinuli ŭ raku, pryviazaŭšy mietaličnyja traki. Ich pryjacielaŭ kinuli ŭ raku z trakami na nahach jašče žyvymi.
U «marozaŭcaŭ» byli kryminalnyja kankurenty. Ź imi bandyty raspravilisia chutka i žorstka. Traich čałaviek vyvieźli ŭ les, vykapali jamu, padvodzili pa čarzie, bili pa hałavie mietaličnaj truboj i kinuli ŭ jamu, potym dabivali nažami.
Tym časam, kropku ŭ spravie «marozaŭcaŭ» pakul nie pastavili. Niekatoryja bandyty jašče na voli, u mižnarodnym vyšuku. Inšych zatrymlivali ŭ Rasii i pakul nie viarnuli ŭ Biełaruś, jak, naprykład, kilera bandy Ihara Kuleŭskaha.
Toj pisaŭ skarhi ŭ roznyja rasijskija instancyi, i ŭ Jeŭrapiejski sud pa spravach čałavieka. Biełaruś patrabavała ad Rasii ekstradycyi padazravanaha, i harantavała, što kali jon sudom budzie pryznany vinavatym, to da jaho nie budzie prymieniena śmiarotnaje pakarańnie.
