Homielski aktyvist Juryj Rubcoŭ, jaki znachodzicca ŭ śledčym izalatary ŭ Baranavičach (Bresckaja vobłaść), maje namier pierajści na suchuju haładoŭku, kali sud nad im buduć pravodzić u zakrytym režymie. Ab svaim namiery Rubcoŭ paviedamiŭ u liście pravaabarončamu sajtu spring96.org.
Homielski aktyvist piša, što pa-raniejšamu trymaje haładoŭku i nie źbirajecca jaje spyniać. Haładać jon pačaŭ 6 krasavika ŭ znak pratestu suprać spravy, pa jakoj jaho asudzili, i toj, jakaja ŭ dačynieńni da jaho zaviedziena pa art. 415 KK (uchileńnie ad adbyvańnia pakarańnia ŭ vyhladzie abmiežavańnia voli). Abiedźvie spravy Rubcoŭ ličyć sfabrykavanymi.
«Ja ŭžo papiaredziŭ načalnika SIZA № 6 ab tym, što ŭ vypadku praviadzieńnia nada mnoj zakrytaha sudovaha razboru abjaŭlu suchuju haładoŭku. Heta moj adziny ryčah uździejańnia», — adznačyŭ hramadski aktyvist.
Akramia hetaha, Rubcoŭ napisaŭ, što jon «vierahodna, mocna prastudziŭsia», u jaho «balić śpina ŭ vobłaści łapatak, ciažka dychać». «Jazva tolki-tolki pačała davać siabie adčuvać, a tak — badziory, rašučaści chapaje», — acharaktaryzavaŭ stan svajho zdaroŭja hamialčanin.
6 kastryčnika 2014 hoda sud Centralnaha rajona Minska pryhavaryŭ 53-hadovaha Juryja Rubcova da dvuch z pałovaj hadoŭ abmiežavańnia voli z nakiravańniem u papraŭčuju ŭstanovu adkrytaha typu (PUAT), adnak z ulikam amnistyi realny termin pakarańnia byŭ skaročany da paŭtara hoda. Rubcova abvinavacili ŭ źniavazie sudździ suda Savieckaha rajona Kiryła Pałulecha, jaki vioŭ u dačynieńni da jaho administracyjny praces paśla akcyi «Čarnobylski šlach» 28 krasavika 2014 hoda ŭ Minsku (art. 391 KK).
Adbyvajučy pakarańnie ŭ PUAT u vioscy Kuplin Pružanskaha rajona Bresckaj vobłaści, asudžany aktyvist admaŭlaŭsia pracavać z-za nizkaj zarpłaty. Rubcoŭ patrabavaŭ zabiaśpiečyć jaho pracaj ź siaredniaj zarpłataj pa krainie (600 dołaraŭ ZŠA ŭ ekvivalencie). Heta i stała padstavaj dla raspačynańnia novaj kryminalnaj spravy.
