Siońnia paśla rekanstrukcyi była adkrytaja pieršaja čarha novaha stadyjona futbolnaha kłuba «Minsk».
Na ŭračystaj cyrymonii adkryćcia prysutničali staršynia Minharvykankama Andrej Šorac, staršynia asacyjacyi «Biełaruskaja fiederacyja futboła» Siarhiej Rumas, hienieralny dyrektar futbolnaha kłuba «Minsk» Ihar Šłojda i inšyja słužbovyja asoby.
Arena na vuł. Majakoŭskaha (były stadyjon «Kamvolščyk») maje dźvie krytyja trybuny ahulnaj umiaščalnaściu 3000 hledačoŭ. Hazon štučny. Pole abstalavanaje sistemaj padahrevu i padychodzić dla matčaŭ praktyčna luboha ŭzroŭniu.
Vakoł pola ŭstanoŭlenyja aśviatlalnyja mačty, jość sučasnaje tabło i kamientatarskija kabiny. Tuzin raździavałak raźmiaściŭsia ŭ administracyjnym korpusie. Adsiul niepasredna na futbolnaje pole kamandy zmohuć trapić praz tunel. Niedaloka ad asnoŭnaj areny budujecca jašče adno pole, dla trenirovak. Jano niestandartnych pamieraŭ (pakolki pašyrycca ŭžo nie dazvalała terytoryja), tam taksama płanujecca ŭstalavać aśviatleńnie dla futbolnych zaniatkaŭ u ciomny čas sutak. Zdać trenirovačnuju placoŭku źbirajucca da siaredziny leta. Ahulnaja suma na rekanstrukcyju stadyjona, pa słovach Ihara Šłojdy, skłała kala $8 młn.
