Historyja kapitana Kida ŭ svoj čas natchniła piśmieńnika Robierta Styviensana na napisańnie «Vyspy skarbaŭ».
Źlitak vahoj 50 kiłahramaŭ byŭ znojdzieny na płytkavodździ la bierahoŭ vyspy Sent-Mary (Nusi-Buracha) na ŭschod ad Madahaskara.
Znachodka była pieradadzienaja prezidentu Madahaskara na śpiecyjalnaj cyrymonii, u jakoj pryniali ŭdzieł brytanskija i amierykanskija dypłamaty.
Źlitak byŭ znojdzieny kamandaj daślednikaŭ na čale ź viadomym padvodnym archieołaham z ZŠA Bary Klifardam. Jon nie sumniavajecca, što znojdzieny im źlitak zachoŭvaŭsia na karabli, pabudavanym u XVII stahodździ ŭ Anhlii.
Adnak šerah śpiecyjalistaŭ zajaŭlaje, što dokazaŭ, jakija paćviardžajuć sapraŭdnaść znachodki, niedastatkova i patrabujecca dadatkovaja ekśpiertyza. Adzin z varyjantaŭ — adpravić uzory draŭniny patanułaha karabla ŭ Brytaniju, kab vyznačyć, ci sapraŭdy sudna było pabudavana ŭ Anhlii.
Pasoł Vialikabrytanii ŭ Madahaskary Cimaci Smart vykazaŭ nadzieju, što ŭ lubym vypadku znachodka Klifarda pavysić papularnaść dziaržavy siarod turystaŭ.
Uiljam Kid (pavodle inšych źviestak, jaho zvali Robiertam) naradziŭsia ŭ Šatłandyi kala 1645 hoda.
U 1695 hodu kapitan atrymaŭ ad brytanskaha ŭrada kapierski (karsarski) patent, jaki dazvalaŭ jamu rabavać handlovyja sudny varožych Anhlii dziaržaŭ.
U 1698 Kid napaŭ na armianskaje sudna «Kiedachski kupiec», jakija išli pad francuzskim ściaham. Kapitanam «Kupca» byŭ anhličanin Džon Rajt. Pasiarednikam u hetym płavańni była Anhlijskaja Ost-Indskaja kampanija. Na borcie znachodziŭsia hruz z Uschodniaj Indyi: atłas, muślin, šoŭk, zołata, srebra.
Z-za taho, što Kid napaŭ na sudna, jakoje mieła dačynieńnie da Ost-Indskaj kampanii, suprać jaho byli vyłučanyja abvinavačvańni ŭ piractvie. Akramia taho, kapitanu pradjavili abvinavačańnie ŭ zabojstvie člena ekipaža jaho sudna padčas buntu ŭ 1697 hodzie.
U 1701 Uiljama Kida pryznali vinavatym i paviesili, pryčym z druhoj sproby, pakolki ŭ pieršy raz viaroŭka abarvałasia. Pavodle lehiendy, jamu ŭdałosia schavać značnuju častku narabavanaha.
