Za zabojstva z asablivaj žorstkaściu svajoj sužycielki asudžany 39-hadovy niepracujučy žychar Bresta.
Jak paviedamiła prakuror adździeła prakuratury Bresckaj vobłaści Viera Fiłonik, jakaja padtrymlivała dziaržaŭnaje abvinavačańnie pa spravie, złačynstva było ŭčynienaje ŭ noč z 14 na 15 vieraśnia 2014 hoda ŭ lesapasadcy niepadalok ad vulicy Čyrvonahvardziejskaj u Breście. U stanie ałkaholnaha apjanieńnia mužčyna ŭ chodzie svarki z 37-hadovaj sužycielkaj nanios toj nie mienš čym 51 udar rukami i nahami pa hałavie, ciele, kaniečnaściach, utrymlivajučy za vałasy, udaraŭ hałavoj ab drevy. U vyniku žančynie byli pryčynienyja ciažkija cialesnyja paškodžańni, ad jakich jana pamierła na miescy.
Mužčyna sprabavaŭ schavać jaje cieła, adciahnuŭšy dalej ad darohi i nakryŭšy znojdzienaj kurtkaj. 15 vieraśnia jon byŭ zatrymany pa padazreńni va ŭčynieńni zabojstva. Ź jaho słoŭ, pryčynaj kanfliktu stała toje, što sužycielka nie chacieła iści ź im.
Jak dapoŭniła Fiłonik, raniej mužčyna nieadnarazova źbivaŭ sužycielku. U 2013 hodzie za takija dziejańni jon byŭ sudzimy pa č. 2 art. 154 KK (katavańnie) i art. 186 KK (pahroza zabojstvam) i pryhavorany da adnaho hoda i miesiaca pazbaŭleńnia voli. Paśla adbyvańnia pakarańnia vyzvaliŭsia 19 sakavika 2014 hoda.
Sudovaja kalehija pa kryminalnych spravach Bresckaha abłasnoha suda pryznała mužčynu vinavatym u naŭmysnym supraćpraŭnym pazbaŭleńni žyćcia čałavieka, učynienym z asablivaj žorstkaściu (p. 6 č. 2 art. 139 KK) i pryhavaryła da 18 hadoŭ pazbaŭleńnia voli z adbyvańniem pakarańnia ŭ papraŭčaj kałonii strohaha režymu.
Ź jaho spahnana na karyść baćki zabitaj žančyny kala 100 młn. rubloŭ. «U sudovym pasiadžeńni abvinavačvany nie pryznaŭ svajoj viny, zajaŭlajučy, što zabojstva ŭčyniŭ nieviadomy mužčyna, jaki ŭ hety čas znachodziŭsia ŭ lesapasadcy», — skazała Fiłonik.
Pryhavor nie nabyŭ zakonnuju moc i moža być abskardžany. Raniej mužčyna šeść razoŭ byŭ sudzimy.
