Vystupaje Juryj Biabieška
Siońnia ŭdzielnikaŭ kanfierencyi vitali pradstaŭnik ABSIE pa svabodzie ŚMI Dunia Mijatavič, byłaja prezident Łatvii Vajra Vikie-Frejbierha. U svajoj pramovie Mijatavič zhadała takija krainy, jak Azierbajdžan i Biełaruś, dzie žurnalistaŭ aryštoŭvajuć i zatrymlivajuć za ich publikacyi.
«Treba kazać prosta, nie pavinna być supracoŭnictva z krainami, jakija parušajuć pravy čałavieka. Svaboda ŚMI jość bazavym pravam i my majem dačynieńni z uradami, jakija sistematyčna hetaje prava parušajuć», — skazała Mijatavič.
Vialikaja častka dakładaŭ była pryśviečanaja rasijskaj prapahandzie, a taksama srodkam supraćstajańnia joj.
Dyrektar Asacyjacyi niezaležnaj presy Małdovy Pietru Makaviej navat prapanavaŭ, kab Jeŭrasajuz nacisnuŭ na ŭrady krain «Uschodniaha partniorstva», kab jany bolš aktyŭna supraćstajali rasijskaj prapahandzie.
Na dumku Makavieja, ułady Małdovy niedastatkova ŭvahi ŭdzialajuć hetamu pytańniu. A vyniki apošnim parłamienckich i miascovych vybaraŭ u Małdovie śviedčać pra ŭzmacnieńnie prarasijskich nastrojaŭ.
Hetuju ž samuju temu zakranuła i byłaja staršynia BAŽ Žanna Litvina. Jana adznačyła, što kryzis dziaržaŭnych ŚMI ŭ Biełarusi prajaviŭsia padčas padziej na Majdanie i bajavych dziejańniaŭ va Ukrainie, kali padkantrolnyja ŭładaj ŚMI trapili ŭ svojeasablivy stupar i nie viedali, jak aśviatlać hetyja padziei biez padkazki ź vierchu.
«My zastalisia ŭ savieckaści. Z tych časoŭ u nas zastałosia staŭleńnie da miedyjaŭ jak da ruchavikoŭ dziaržaŭnaj ideałohii, absłuhoŭvajučy piersanał»,— zajaviła Žanna Litvina.
Ekśpiert zaznačyła, što Biełaruś – heta najbolš uraźlivaja kraina. «Rasijskaja prapahanda ŭ Biełarusi padaje va ŭdziačnuju hlebu, - skazała Litvina. – Dźvie traciny biełarusaŭ daviarajuć rasijskim ŚMI. Pa dadzienych sacyjołahaŭ, bolš za 60% žycharoŭ Biełarusi stanoŭča pastavilisia da anieksii Kryma».
Na dumku Litvinoj, najmienš padpadajuć rasijskaj prapahandzie źjaŭlajucca čytačy i hledačy niezaležnych ŚMI. Tamu padtrymka niezaležnych pavinna być pryjarytetnaj u palitycy Jeŭrasajuza.
Nie abyšła Žanna Litvina i ciakučyja pytańni funkcyjanavańnia ŚMI ŭ Biełarusi. Naprykład, što mnohija žurnalisty pracujuć biez akredytacyju, jakuju admaŭlajecca vydavać Ministerstva zamiežnych spravaŭ. Havorka išła i pra novy Zakon ab ŚMI, jaki ad 1 studzienia ŭstupiŭ u siłu, pavodle jakoha dziaržava moža błakavać niaŭhodnyja sajty.
Ustupiŭ u dyskusiju ź Litvinoj namieśnik načalnika ŭpraŭleńnia pravavoj i kadravaj raboty Ministerstva infarmacyi Juryj Biabieška.
Jon adznačyŭ, što biełaruskaje zakanadaŭstva raźvivajecca «z ulikam nacyjanalnych asablivaściaŭ». A pra manapalizacyju śfiery ŚMI niama čaho kazać, bo 70% usich zarehistravanych u Biełarusi ŚMI – niedziaržaŭnyja. Praŭda, varta adznačyć, što ź ich hramadska-palityčnych — minimum. Heta haziety pra sad i aharod, ci zborniki kryžavanak.
Taksama Biabieška daŭ ličby, što ad 1 studzienia pa inicyjatyvie Ministerstva infarmacyi było zabłakavana 18 sajtaŭ. 15 ź ich raspaŭsiudžvali narkotyki, adzin – ź dziciačaj parnahrafijaj, a jašče dva – za tabujavanuju leksiku.
Na dumku čynoŭnika, heta nie supiarečyć suśvietnym tendencyjam. Ale ničoha nie było skazana pra śniežańskuju błakiroŭku niezaležnych infarmacyjnych resursaŭ.
Adzin z haściej Foruma, armianski žurnalist Barys Navasardzian u vyniku prapanavaŭ vyrašyć prablemu biełaruskich ŚMI radykalna — začynić Ministerstva infarmacyi. Na što atrymaŭ svaju porcyju apładysmientaŭ.
