Šanavańnie ŭdzielnikaŭ 7-j Biełaruskaj antarktyčnaj ekśpiedycyi prajšło 21 maja ŭ Nacyjanalnaj akademii navuk. Apošnija palarniki viarnulisia ŭ Minsk napiaredadni.
Ekśpiedycyja na praciahu paŭhoda pracavała ŭ Antarktycy na miescy mierkavanaha budaŭnictva Biełaruskaj antarktyčnaj stancyi ŭ rajonie hary Viačerniaja.
Udzielniki ekśpiedycyi pravodzili daśledavańni pa piaci navukovych kirunkach zadańniaŭ Dziaržaŭnaj prahramy «Manitorynh palarnych rajonaŭ Ziamli i zabieśpiačeńnie dziejnaści arktyčnych i antarktyčnych ekśpiedycyj na 2011—2015 hady».
Jak paviedamiŭ načalnik ekśpiedycyi, namieśnik načalnika Centra palarnych daśledavańniaŭ Alaksiej Hajdašoŭ, vykanany vialiki kompleks rabot pa vyprabavańni novych techničnych srodkaŭ biełaruskich raspracoŭščykaŭ dla dystancyjnaha zandziravańnia pryrodnaha asiarodździa, pa vyvučeńni pryrodnych resursaŭ Antarktyki i klimatyčnych umoŭ. Taksama była abuładkavanaja i padrychtavana placoŭka dla ŭstanoŭki pieršych modulaŭ Biełaruskaj antarktyčnaj stancyi.
«Akramia taho, nabrany vielmi bahaty praktyčny navukovy materyjał, šmat uzoraŭ i prob, — zaznačyŭ Hajdašoŭ. — Usio heta znachodzicca ŭ darozie z Sankt-Pieciarburha i zaŭtra prybyvaje ŭ Minsk. Dalej uvieś materyjał budzie pieradadzieny dla apracoŭki śpiecyjalistam. Havaryć pra niejkija pieršyja značnyja navukovyja vyniki možna budzie praz paru miesiacaŭ».
Zakranajučy supracoŭnictva z rasijskimi kalehami, Hajdašoŭ zaznačyŭ: «Ciapier my pracujem plačo ŭ plačo, inakš nie skažaš. I heta nie prosta prafiesijnaja družba i prafiesijnaje supracoŭnictva. Heta važny elemient mižnarodnaj palityki našych dziaržaŭ-sajuźnic na mižnarodnaj arenie. Źjaŭlajučysia členami Dahavora ab Antarktycy, Rasija i Biełaruś mohuć prymać sumiesnuju pazicyju pry vypracoŭcy abo pryniaćci rašeńniaŭ, jakija tyčacca budučyni Antarktyki. My nie ŭzhadniajem svaju prahramu z rasijanami. U nas jość svaja dziaržaŭnaja prahrama, i pry jaje viorstcy i vyznačeńni navukovych kirunkaŭ my nie ahladajemsia na toje, ci žadali b našy najbližejšyja susiedzi i partniory pa Antarktycy bačyć hetyja kirunki ŭ našaj prahramie. A ŭžo potym my znachodzim kropki sutyknieńnia ŭ navukovych daśledavańniach, jakija cikaviać abodva abo niekalki bakoŭ».
Pavodle słoŭ vučonaha, pry sumiesnaj pracy dubliravańnie daśledčych rabot vyklučana. «Uzrovień śpiecyjalistaŭ i z taho, i ź inšaha boku dastatkova vysoki, i ŭ sumiesnych prahramach my tolki kaardynujem namahańni i pavyšajem efiektyŭnaść rabot. U lubym vypadku ŭnutry navukovych tematyk isnuje raździaleńnie pracy».
Hajdašoŭ padkreśliŭ, što ŭ apošniaj ekśpiedycyi vialiki ŭpor byŭ zrobleny na raboty pa mikrabijałohii, jakaja abiacaje realnyja pierśpiektyvy dla raźvićcia bijatechnałohij. «Našymi vučonymi, u pryvatnaści, vyznačany niekatoryja vidy bakteryj, naprykład destruktary naftapraduktaŭ, — adznačyŭ jon. — U nas zdarajucca nievialikija łakalnyja raźlivy naftapraduktaŭ. I na nastupny dzień my bačym na miescy plamy buruju pienu. Kali mikrabijołahi jaje daśledavali, akazałasia, što heta miascovyja bakteryi, jakija pasialilisia na hetym substracie i paśpiachova jaho źniščajuć, charčujučysia im ža. I heta tolki adzin z kirunkaŭ, jaki moža prymianiacca ŭ pierśpiektyvie. Akramia taho, vyvučeńnie zdolnaści mikraarhanizmaŭ i bakteryj vyžyvać va ŭmovach lodu — heta vialikaja pierśpiektyva dla raźvićcia farmaceŭtyki, miedycyny».
