Alaksandr Łukašenka daručyŭ premjer-ministru Biełarusi Andreju Kabiakovu prakantralavać, kab da siaredziny 2016 h. na pradpryjemstvach usich formaŭ ułasnaści krainy źjavilisia prafsajuznyja arhanizacyi.
Takoje rasparadžeńnie kiraŭnik dziaržavy zrabiŭ, vystupajučy 22 maja na źjeździe Fiederacyi prafsajuzaŭ Biełarusi ŭ Minsku.
«Pryvatny siektar ekanomiki ŭ Biełarusi pastajanna raście. Da nas prychodziać zamiežnyja inviestary, stvarajucca sumiesnyja pradpryjemstvy i filijały bujnych zamiežnych karparacyj. Na ich pracujuć našy suajčyńniki, jany majuć poŭnaje prava na abaronu svaich intaresaŭ», — zajaviŭ Łukašenka.
Jon nie vyklučyŭ, što rehistracyja pryvatnaha pradpryjemstva, asabliva zamiežnaha, pavinna adbyvacca z adnačasovym stvareńniem prafsajuznaj supołki.
Akramia taho, dadaŭ kiraŭnik dziaržavy, pry restrukturyzacyi, pryvatyzacyi i źmienie ŭłaśnika ŭ arhanizacyi abaviazany zachoŭvacca prafsajuzy.
Łukašenka źviarnuŭ uvahu na toje, što niedziaržaŭny siektar ekanomiki niaredka parušaje patrabavańni zakanadaŭstva ab pracy.
«Kiraŭniki niekatorych kampanij i firmaŭ u pahoni za prybytkam nie nadajuć naležnaj uvahi ŭmovam pracy, miedycynskaha absłuhoŭvańnia, časta pieraškadžajuć stvareńniu piarvičnych arhanizacyj prafsajuzaŭ. Sychodziačy ad afarmleńnia dahavornych adnosin z rabotnikam, vypłočvajuć zarobki ŭ kanviertach, z pryčyny čaho pazbaŭlajuć ich zakonnaha prava na sacyjalnuju padtrymku i harantavanaje piensijnaje zabieśpiačeńnie», — padkreśliŭ kiraŭnik dziaržavy.
Jon źviarnuŭsia da premjer-ministra Andreja Kabiakova: «Andrej Uładzimiravič, davajcie damovimsia tak: da siaredziny nastupnaha hoda va ŭsich pracoŭnych kalektyvach, usio roŭna jakoj formy ŭłasnaści: pryvatnaj, dziaržaŭnaj abo źmiašanaj, pavinny być prafsajuznyja arhanizacyi».
Jak raniej paviedamlałasia, vystupajučy siońnia na źjeździe, staršynia FPB Michaił Orda paprasiŭ Łukašenku pasadziejničać stvareńniu prafsajuzaŭ u pryvatnym siektary ekanomiki.
Jon paviedamiŭ, što za apošni čas FPB stvaryła 37 novych prafsajuznych arhanizacyj na pryvatnych pradpryjemstvach, ale adznačyŭ, što ŭ niedziaržaŭnych arhanizacyjach nazirajecca schavanaje procidziejańnie hetamu pracesu.
Orda, u pryvatnaści, raspavioŭ, što vialisia pieramovy ab stvareńni prafsajuza ŭ struktury apieratara mabilnaj suviazi Velcom, adnak dyjałoh ni da čaho nie pryvioŭ.
Kiraŭnik FPB paprasiŭ Łukašenku ŭdakładnić zakanadaŭstva i ŭvieści administracyjnuju adkaznaść u dačynieńni da najmalnikaŭ, jakija pieraškadžajuć stvareńniu prafsajuza na svaim pradpryjemstvie.
