Reuters.com
U Ńju-Džersi ŭ aŭtamabilnaj katastrofie zahinuŭ matematyk, łaŭreat Nobieleŭskaj premii pa ekanomicy Džon Neš. Razam ź im raźbiłasia jaho žonka Ališa Neš.
Muž i žonka znachodzilisia ŭ taksi, jakoje sutyknułasia ź inšaj mašynaj na šašy, a zatym ŭrezałasia ŭ aharodžu.
Džonu Nešu było 86 hadoŭ, Ališy Neš — 82 hady.
Džon Neš, vypusknik Prynstanskaha ŭniviersiteta, zajmaŭsia teoryjaj hulniaŭ i dyfierencyjalnaj hieamietryjaj. U 1994 hodzie za pracy pa teoryi hulniaŭ jon byŭ uhanaravany Nobieleŭskaj premijaj pa ekanomicy.
Neš pracavaŭ bolšuju častku svajho žyćcia, niahledziačy na toje, što ŭ 1959 hodzie ŭ jaho dyjahnastavali paranaidalnuju šyzafreniju.
U kancy 1990-ch hadoŭ žurnalistka Silvija Nazar napisała bijahrafiju Neša, jakaja pasłužyła asnovaj dla filma «Hulni rozumu» (A Beautiful Mind) režysiora Rona Chovarda.
Hałoŭnyja roli ŭ karcinie syhrali Raseł Kroŭ i Dženifier Koneł. Stužka atrymała šmatlikija ŭznaharody, uklučajučy premiju «Oskar» u naminacyjach «Najlepšy film» i «Najlepšaja režysiorskaja rabota».
Raseł Kroŭ napisaŭ u «Tvitar», što jaho ašałamiła hibiel Neša. «Usioj dušoj spačuvaju Džonu i Ališy i ich blizkim. Heta dziŭnaja para. Vydatnyja rozumam i vydatnyja dušoj», — vykazaŭsia Kroŭ.
***
Ališa Neš dapamahała mužu spravicca z chvarobaj. Jany razam stali šmat vystupać publična na temu pravoŭ ludziej ź psichičnymi rasstrojstvami.
Pa niekatorych paviedamleńniach, u momant aŭtakatastrofy muž i žonka nie byli pryšpilenyja.
Neš ažaniŭsia z Ališaj Łard u 1957 hodzie, kali jon ličyŭsia ŭzychodziačaj zorkaj u śviecie matematyki.
Nieŭzabavie paśla hetaha ŭ jaho raźviłasia vostraja forma šyzafrenii. Žonka niekalki razoŭ źmiaščała jaho ŭ psichijatryčnuju kliniku. U 1962 hodzie jana raźviałasia.
Adnak jany zastalisia blizkija adno adnamu, a da pačatku 1980-ch hadoŭ stan vučonaha staŭ palapšacca. U 2001 hodzie byłyja muž i žonka znoŭ zaklučyli šlub.
U pačatku tydnia Nešu była prysudžana prestyžnaja Abieleŭskaja premija.