6 červienia pamior ks. Jan Zanieŭski, probašč parafii Biezzahannaha Začaćcia Najśviaciejšaj Panny Maryi ŭ Kvasoŭcy (Hrodzienski rajon).
Jon pražyŭ na hetym śviecie amal 50 hadoŭ, ź jakich amal 25 pravioŭ u Chrystovym śviatarstvie, piša catholic.by.
«Nie chaciełasia spačatku vieryć, kali daviedalisia ab hetaj navinie. Było praŭdaj toje, što ŭ apošni čas jon vielmi ciarpieŭ, chvaroba valiła jaho z noh. Heta śviatar, jaki zaŭsiody byŭ aktyŭny na poli dušpastyrstva, zaŭsiody imknuŭsia da spraviadlivaści. Zaŭsiody kłapaciŭsia ab dzieciach, moładzi, ab ich katechizacyi ŭ Hrodzienskaj dyjacezii. Dla jaho było vielmi važna toje, kab Boh byŭ u sercach maładych ludziej, kab jany nikoli nie zabyvali darohi da kaścioła, na katechiezu», — napisaŭ u niekrałohu śviatar Juryj Marcinovič.
Ajciec Jan «staraŭsia kožnaha vysłuchać, kala kožnaha zatrymacca chacia b na chvilinu. Heta było bačna padčas kožnaj sustrečy z hetym hodnym śviatarom», zaznačaje Ju. Marcinovič,
«Šmat serca a. Zanieŭski układvaŭ u spravu adnaŭleńnia parafijalnaj śviatyni, jak taksama i ŭ adnaŭleńnie Kaścioła, jaki ŭtvarajuć sami ludzi. Z momantu svajho prybyćcia ŭ Kvasoŭku zajmaŭsia ramontami. Najpierš ramont kaścioła, potym prykaściolnaj terytoryi, parafijalnych załaŭ, plabanii – usio rabiŭ pa paradku, bo mocna chacieŭ, kab usiudy byŭ paradak. Pry kožnym vizicie ŭ Kvasoŭku paŭtaraŭ, što «ŭ nas zaŭsiody ramonty, bo treba ž niešta rabić!».
