Hetak ličyć žurnalist Hołman Dženkins-małodšy, jaki ŭ najnoŭšym vydańni The Wall Street Journal analizuje dziejańni prezydenta Rasiei.
Aŭtar nahadvaje, što vydatki na armiju ŭ Rasiei na siońniašni dzień dasiahnuli ŭzroŭniu 14% vałavoha ŭnutranaha praduktu (u ZŠA hetyja vydatki składajuć 4% VUP). I praciahvaje:
«Sam Pucin, ź miesca apošniaj zimovaj alimpijady ŭ Sočy, na jakuju jahony režym vykłaŭ 50 miljardaŭ dalaraŭ, skazaŭ vyšejšamu vajskovamu kiraŭnictvu krainy: «My možam i pavinny zrabić dla abaronnaha sektaru toje, što my zrabili dla Sočy. Usie pytańni, źviazanyja z adpaviednym raźmierkavańniem resursaŭ, byli vyrašanyja».
Dalej aŭtar pryvodzić ścisłyja cytaty z knižki pra militaryzacyju hitleraŭskaj Niamieččyny pry Hitlery ŭ 1930-ch hadach, napisanaj brytanskim historykam i bijohrafam Hitlera Ienam Keršaŭ:
«Vybary [u listapadzie 1933 — RS.], kazaŭ Hitler, dajuć niemcam apošni šaniec adkinuć kamunizm pry dapamozie vybarčych biuleteniaŭ. Kali hetaha nie adbudziecca, jon zmročna namiakaŭ, što budzie zadziejničanaja siła… Ekanomika Niamieččyny pavinna być padparadkavanaja metam padrychtoŭki i praviadzieńnia [mižnarodnaj] baraćby… Paśla taho, jak prajekty hramadzkich rabotaŭ, uklučna z Alimpijskimi hulniami 1936 hodu, a potym štoraz bolš intensiŭnaje pieraŭzbrajeńnie pačali vyciahvać Niamieččynu z recesii, Hitler atrymaŭ usie prapahandysckija kozyry… Pad kaniec 1938 hodu cisk farsiravanaj prahramy pieraŭzbrajeńnia pačaŭ adčuvacca vielmi vostra. Stała vidavočna, što palityku «pieraŭzbroimsia lubym koštam» možna ŭtrymać tolki ŭ karotkaterminovaj perspektyvie… Praciahłyja ekanamičnyja ciažkaści byli asnoŭnym stymułam da pavieličeńnia niamieckaha cisku na Aŭstryju… Z ekanamičnaha hledzišča, padzieńnie Čechasłavaččyny taksama davała pavabnuju perspektyvu… Jon nia vieryŭ, što budzie vajskovaja reakcyja. U horšym vypadku mahli być ekanamičnyja sankcyi».
Pavodle Hołmana Dženkinsa-małodšaha, prezydenckija vybary ŭ Rasiei ŭ 2018 buduć praviedzienyja ŭ takim klučy, što jany stanuć nasamreč referendumam, na jakim hołas za Pucina budzie padavacca prapahandystami jak padtrymka Rasiei, a hołas suprać jaho — jak padtrymka jaje vorahaŭ.
«Da histaryčnych analohij treba, biezumoŭna, padychodzić z aściarohaj, ale hetaja analohija moža nam rastłumačyć sioje-toje pra naturu režymaŭ, pabudavanych na adčajnych i biesperspektyŭnych avanturach… Jana taksama moža skazać nam krychu pra toje, jak takija režymy, jak praviła, kančajuć. Historyja adznačaje nia mienš za 10 zamachaŭ na žyćcio Hitlera padčas jahonych 12 hadoŭ va ŭładzie, dva ź jakich nie ŭdalisia tolki dziakujučy niezvyčajnamu niešancavańniu», — zaklučaje aŭtar The Wall Street Journal.
